• mincha d'aqui, consumo local, soberania alimentaria

Estratechia ta minchar d’aqui chenerando economía local y fixando población en o medio rural

O viernes 23 de marzo se celebró en a Diputación Provincial de Uesca a presentación d’a estratechia “Mincha d’aqui”, t’a dinamización d’iniciativas alimentarias locals y sostenibles en o Pireneu y o Somontano Aragonés.

A l’acto acudioron representants politicos, iniciativas de producción, transformación y consumo participants d’o prochecto, asinas como personal d’as administracions y entidatz que han feito posible “Mincha d’aqui”.

“Dinamización d’iniciativas alimentarias locals y sostenibles en o Pireneu y Somontano Aragonés – Mincha d’aqui” ye un prochecto financiau por a Fundación Daniel y Nina Carasso, coordinau por CERAI, que ha contau con l’emparo de diferents entidatz y administracions: Hirondel, Comarca d’a Chacetania y Concello d’Artieda, en Chacetania; Amigos d’a Tierra Aragón, Comarca de l’Alto Galligo, Concello de Samianigo, Concello de Biescas, en Alto Galligo; Un Paso Atrás, Comarca d’o Sobrarbe, Concello de L’Aínsa-Sobrarbe, Concello San Chuan de Plan, Concello de Boltanya, en Sobrarbe; y El Licinar, Comarca d’o Somontano de Balbastro y Centro d’Estudios d’o Somontano de Balbastro, en Somontano de Balbastro. Y tamién con a colaboración d’INTERHES (Instituto Interdisciplinario en Ecolochía Humana y Sustentabilidat).

L’obchectivo de “Mincha d’aqui” ha estau creyar un ret d’iniciativas alimentarias locals y sostenibles, ta afianzar as ya existents y incorporar atras nuevas. Un d’os resultaus finals ha estau elaborar una estratechia final transversal que favoreixca nuevas formas d’emprender, baixo l’enfoque d’a sostenibilidat y l’agroecolochía, nuevas formas d’organizar a distribución, emparando as canals cortas de comercialización y a venda de cercanía, en beneficio d’as iniciativas de producción y consumo.

A estratechia se divide en cinco linias estratechicas, que amás replegan diferents propuestas d’acción. Istas linias estratechicas responden a la sensibilización d’o consumo de productos locals y ecolochicos y visibilización d’as iniciativas alimentarias locals y sostenibles; a formación y asesoramiento a iste tipo d’iniciativas; a creyación de sinerchias y vinclos; l’empente dende as administracions t’a producción, transformación y comercialización d’alimentos sostenibles a ran local; y cambeos normativos que favoreixcan a producción, transformación y comercialización d’alimentos sostenibles a ran local.

A estratechia, disponible <a href=”http://minchadaqui.net/wp-content/uploads/2018/03/mda-estrategia-web2.pdf” target=”_blank” rel=”noopener”>aquí</a>, replega una fuella de ruta con a finalidat de dar continuidat a iste prochecto, amás, seguntes se dio a conoixer o viernes en a presentación, como mecanismo de seguimiento se proposa creyar un Foro u Mesa de treballo a ran comarcal y supracomarcal, totz dos formaus por os propios actors representants d’a cadena agroalimentaria, asinas como personal tecnico d’as administracions y d’as entidatz locals.

En a presentación d’a estratechia, l’equipo impulsor destacó que “o treballo conchunto entre actors heterochenios d’as comarcas implicadas, ha estau talment, a mayor fortaleza d’a estratechia. Amás, a implicación d’as iniciativas de producción y transformación ha estau muito mayor de lo asperau, ya que preveyebanos realizar bellas 50 entrevistas, y a la fin han estau 116, participando muitas d’ellas en as distintas trobadas”. Sobre as mesmas, Esther Ciria, impulsora de “<a href=”http://biocastillazuelo.blogspot.com.es/”>Biocastillazuelo</a>, ye una d’as agricultoras que fan parte d’o ret d’iniciativas “Mincha d’aqui” que asistió a la trobada d’o viernes y matizó que “as entrevistas estioron muit globals y completas y levaban a una reflexión profunda”. Por a suya parte, Antonio Cortijo, d’a iniciativa “<a href=”http://www.partcharan.com/”>Partcharán</a>?, recalcó que “iste prochecto nos ha meso en o mapa, y lo mas important ye que nos ha meso en ret, y gracias a ixo hemos creyau sinerchias con atros productors cercanos a qui no conoixebanos”.

Entre l’evento, tanto a parte promotora d’o prochecto, como as personas asistents a l’evento compartioron impresions, y sobre tot una visión: “a transición a lo agroecológico va a ocurrir; os territorios que se preparen ta iste feito podrán asegurar un desembolique economico local y a conservación d’o suyo patrimonio natural y cultural”.

As promotoras d’o prochecto tamién sinyaloron que “ye necesario que autoridatz y administracions sigan caminando enta un emparo real d’as iniciativas agroalimentarias locals y sostenibles, an s’adapte a normativa a la realidat d’o chicot y chicota productor/a, que son realment qui cheneran economía local, emparando a creyación de retz y sinerchias, mantenendo vivo o comercio en as zonas rurals y mas que mas, fixando población en os territorios”.

Mas información: <a href=”http://www.minchadaqui.net”>www.minchadaqui.net</a>