Sorteu! Dibuixa a SuperMarta

A causa d’o estau d’alarma, iste anyo no ha habiu garra sorteu por o aniversario de Mallata (que en marzo cumplió 5 anyos!!!) asinas que imos a celebrar o Día d’a Tierra! que se celebra totz os anyos o 22 d’abril.

Cómo lo celebramos?

Fa unas semanas conoixebanos a historia de SuperMarta, a ovella heroína, que puetz leyer aquí. Dende hue (22 d’abril) y dica lo 22 de mayo puetz ninviar lo tuyo dibuixo de SuperMarta, imachinando-te a esta ovella heroína salvando la planeta Tierra en l’aventura que tu quieras.

Quáls son las bases?

L’obchectivo no ye fomentar a competitividat, sino a imachinación, asinas que entre totz los dibuixos recibius se sortiarán una taza y un portalapices dibuixaus por l’artista Pilar Serrano, y 5 bolsas de tela de Mallata, tamién disenyadas por a mesma artista.

Pueden participar-ie chovens creyadors menors de 14 anyos que ninvien os suyos dibuixos de SuperMarta a lucia@mallata.com indicando en l’afer “Sorteu SuperMarta”. Han d’adchuntar-se os dibuixos, que pueden estar realizaus a ordinador u a man, en o segundo caso caldrá ninviar una fotografía u os dibuixos escaniaus. Os dibuixos pueden ir acompanyaus d’un chicot texto si l’artista asinas l’amenesta. En o cuerpo d’o email s’ha d’indicar nombre d’o/d’a creyador/a, municipio en o qual vive y edat que tiene en a calendata de ninvio d’o dibuixo. Cada participant puede ninviar totz os dibuixos que quiera en totz os emails que ameneste.

Se pueden ninviar dibuixos dica las 23.59 horas d’o 22 de mayo de 2020. O sorteu se ferá entre os días 23 y 24 de mayo. O ninvio d’os regalos se ferá una vez que lo permita lo estau d’alarma en o qual nos trobamos. Cada dibuixo contará como una participación, por o que quantos mas se’n ninvien, mas posibilidatz bi habrá de ganar. Una vez que se faiga o sorteu, se publicará o nombre d’os/as ganadors/as en o blog y os retz socials y se comunicará a os/as ganadors/as por email pa que faciliten una adreza de ninvio. Nomás se ferán envíos dentro d’o territorio espanyol.

Los dibuixos recibius se publicarán en o blog Mallata.com y en os diferents retz socials asociaus a lo mesmo, indicando nombre, edat y municipio d’os/as autors/as (de no estar que en o email os pais u tutors pidan explicitament que s’omita belún d’istos datos).

Recordatz que SúperMarta ye una ovella marta (negra) 😉

Category : Actualidat
Tags :