Aragón, tierra de pastors

Articlo publicau orichinalment en aragonés o 23 d’abril de 2020 en Eldiario.es Aragón

Se siente un chilo de luén. Será Sant Chorche? Será o dragón? Será la princesa eslampando d’os dos? U talment siga l’onso que, dispertau d’o suyo letargo, y sin rudios humans que lo espanten, baixa y baixa mirando-se de trobar bella cosa que minchar.

Talment, haigamos perdiu ya totz os nuestros dioses y as nuestras leyendas y no nos queden Sant Chorches que nos viengan a salvar.

Talment, nos haigamos convertiu en una especie que no ye ya Homo Sapiens. Puet estar que haigamos desevolucionau, y nos haigamos convertiu en un ser individualista que no tien pasau, ni futuro. Que no siente, que no vive.

Nos hemos convertiu en uns cuerpos desgarraus,
en uns pietz desterraus que caminan sin rumbo enta ixe horizont an que muere a tierra.

Dixamos que a maleza amagase a cruz que bi heba en o saso, y nos enzarramos en un ecosistema d’edificios desmembraus an que xublidemos a brempa d’a sabina, a ulor d’o rabanyo, o baile d’as voletas.

Di-me, an quedan agora todas as historias que antesmás s’eslampaban con o fumo d’as chamineras?

Puet estar que sigan apedecadas baixo as labazas d’una casa espaldada… Quantas leyendas s’habrán perdiu? Quantas s’en habrán quedau sin contar? Qué habrá estau d’ixa raza de mullers y hombres que un día marcoron a suya ley dillá an que a distancia ye o mont y a o ciel se le tracta de tú a tú?

Ixe país de nobleza pastoril y ciel azulenco contina vivo, pero nos hemos xublidau d’el. Os nuestros pastors y pastoras s’han convertiu en una especie en periglo d’extinción. En una flor de nieu cada vez más dificil de trobar y que pareix que ya solo miran de protecher as ONGs conservacionistas, pero sin ascuitar-les guaire. Como si existise a suya figura pero no tenesen voz.

Nusotros tamien nos hemos xublidau d’ellos. Comprando productos sin mirar-nos d’an proceden y sin importar-nos guaire. En quántas casas ferán hué ternasco pa chentar? Quánta chent s’aturara a pensar que ixe ternasco ha estau criau por uns pastors que dan vida a los nuestros ecosistemas y que a cambeo reciben un pre inchusto? Que ixos pastors y pastoras han conservau por sieglos os nuestros paisaches, as nuestras leyendas, as nuestras parolas…

Hue celebramos Sant Chorche,
sin libro, ni flor,
sin amigos, ni lanzón,
y en cuentas de sinyal,
un crespón fosco en o balcón.

Y mientras soneamos con tornar-nos liedra y grepar por as finestras. Brincar enta a carrera y sentir o río, os nuestros pastors y pastoras sulcan libres os campos que dan vida a los nuestros paisaches.

Imachen: Pilar Serrano