A lana de l’ansotana

Articlo publicau en Eldiario.es Aragón, o 14 de chinero de 2020

L’atro día belun se sorprendió quan le charré d’Esquellana, una iniciativa social pa transformar a lana d’a ovella guirra, a unica raza d’ovella valenciana, y d’ista forma poder asegurar a las ganaderías o ingreso d’os costes que suposa a esquira. Lo millor d’ista iniciativa ye que fa veyer que l’amor –por a biodiversidat agraria en iste caso- mueve montanyas… A lo menos montanyas de lana, que han dixau d’estar acumuladas en as torres, an que acababan indo directament ta la vasuera, y han resultau estar una d’as claus pa mantener ista raza en periglo d’extinción, ya que as companyeras dezaga d’iste prochecto han aconseguiu que as ganaderías d’ovella guira tiengan un alicient extra que les faiga pensar-se-lo dos veces antes que no cambiar as suyas ovellas por atras en teoría más productivas pero menos adaptadas a o territorio.

Aquí, en Aragón, tamién tenemos una iniciativa que leva anyos funcionando pa recuperar a lana d’una d’as nuestras razas autoctonas, a ovella ansotana, que tien una lana d’excelent calidat con a que antes más se confeccionaba o trache ansotano. Manimenos, a gran calidat d’ista lana cayó en l’olvido, cayendo tamien o suyo uso, más que más en a epoca actual, an que a penar d’a crisi climatica, seguimos vestindo-nos con plastico antes que no buscar materials sostenibles como ye a lana d’as nuestras ovellas locals.

O nuestro amplo, diverso y peculiar territorio de polvo, viento, boira y sol, ha feito a que tiengamos ni mas ni menos que nueu razas ovinas: a rasa aragonesa, a ojinegra de Teruel, a maellana, a roya bilbilitana, a churra tensina, a xisqueta, l’ansotana, a cartera y a merina d’os Monts Universals. Fueras d’as dos primeras, todas ellas se troban en periglo d’extinción.

Con tot y con ixo a nuestra marabillosa diversidat chenetica, a mayoría d’a población desconoix ista riqueza. Ye más, desconoixen tamién a cultura y os paisaches asociaus a ella, asinas como as historias que cada flocón amaga. A ovella ansotana, por eixemplo, amás de producir una excelent lana, tamien produciba una leit de gran calidat con a que se feba un queso que apareix mencionau en o Diccionario cheografico-estadistico-historico d’Espanya y as suyas posesions d’Ultramar de Pascual Madoz como lo millor d’o Pireneu. Y charro en pasau porque a día de hue dengun no muye ovellas ansotanas. A merina d’os Monts Universals, d’atra man, ye resultau d’a transuancia que encara hue practica a chent d’a Sierra d’Albarracín, que se tresladan totz os agüerros dica tierras andaluzas en busca de paixenters pa as suyas ovellas. Y, atra curiosidat, a nuestra roya bilbilitana recibe iste nombre por a color roya d’a suya lana.

No dixa d’estar curioso lo adaptadas que son as nuestras razas a la nuestra agreste tierra, fendo parte d’o paisache, y aconseguindo cualcosa que a simple vista pareix tan imposible como alimentar-se en un territorio tan duro como o monegrino, como fa la rasa.

Manimenos o necesarias que son as nuestras ovellas a l’hora de preservar os nuestros ecosistemas, de mantenir vivos os nuestros lugars, de conservar a biodiversidat, d’estar fundamentals pa adaptar-nos a o cambeo climatico, en a zaguera decada o numero d’ovellas en Aragón ha baixau un 45%, a o ritmo que os nuestros lugars continan quedando-se desiertos.

Si realment nos preocupa o medio ambient, o medio rural, a nuestra cultura y a nuestra historia, hemos de aduyar a las ganaderías en extensivo consumindo productos d’istas razas, como o ternasco d’Aragón, o lechal tensino u a lana de l’ansotana. Porque ye a lana d’istas ovellas la que teixe o nuestro territorio.