Una mallata ye un puesto en metat d’o campo u d’a montanya que sirve como cubilar a o bestiar y os pastors en as nueitz que se dedican a o pastoreo u a transuancia, en zonas a l’aire libre. A traducción aproximada de mallata en castellán ye “majada”.

En a enciclopedia dichital Wikipedia trobamos que a mallata “se compone d’una u quantas casas chicotas u chozas que sirven de cobertizo a o bestiar y acondicionadas como cubilar t’o pastor, rodiadas d’una cleta, normalment de piedra, que fa as veces de corral. Se gosan situar en zonas an que l’augua, os pastos y l’alimento son abundants y os animals puedan estar prou abastecius”.

Iste blog naixe ta estar una mallata, un cubilar an trobar información sobre agroecolochía, sobiranía alimentaria, desembolique rural y ganadería extensiva, un espacio pa compartir-la y pa que pueda ir de cabanyera ta atras mallatas, y asinas, china chana, provocar en a consciencia de todas y totz a necesidat de cambiar o sistema productivo actual.

Bienvenidas todas as personas que quieran habitar iste cubillar.