Continemos teixindo lo medio rural

“Soi a tercera cheneración d’hombres que vienen d’a tierra y d’a sangre. D’as mans d’o mío güelo atando os quatro estomagos d’un remugant. D’os pietz d’o mío bisvuelo fundius en a espalda d’un macho ta plegar en a oliva. D’a voz y a cabeza de mi pai repetindo yo con a tuya edat yo y o tuyo güelo yo y os hombres“. Iste poema ye escrito por María Sánchez y amaneixe replegau en o suyo libro Cuaderno de Campo (La Bella Varsovia, 2017). Fa pocos días, María denunciaba en a suya cuenta de twitter (@MariaMercromina) a falta de visibilización d’as mullers en bells espacios, concretament en bellas tertulias televisivas, y destacaba que a falta de referents femenins puede provocar que i haiga ninas que creyan que no van a poder plegar a estar o que les fería goyo estar porque solament veyen hombres desembolicando ixa función.

Ye muit necesario tener referents fuera de l’entorno proximo, ta dar-nos cuenta que podemos plegar tot lo luen que nos proposemos. Por iste motivo he quiesto escribir iste articlo, en o qual me fería goyo de visibilizar a qualques d’as muitas mullers que treballan por o medio rural, a qui admiro y son referents míos ta seguir abanzando. Como no i cullen todas, me voi a limitar a mencionar a qualques d’as qualas podemos trobar dende qualsiquier punto d’a planeta en os retz socials, y a aquellas a las qualas antes que no existisen os retz socials, yo buscaba en os libros.

En l’actualidat, os retz socials, especialment twitter, son a millor ferramienta ta conoixer a atras mullers que treballan por o medio rural y visibilizar a suya labor; ya que permite crebar con as distancias y estar connectadas. Y ye a traviés d’os retz socials an que he descubierto a mullers rurals de referencia ta yo como son a ya mencionada María Sánchez (@MariaMercromina), albeitar, escritora, y apasionada d’as crabas, d’o medio rural y d’as mullers que luitan; Patricia Dopazo (@atomsdecolorins), de l’equipo editor d’a Revista Sobiranía Alimentaria y una gran difusora d’o treballo d’as mullers rurals; Anna Gomar (@AnnaAnnetes), albeitar, perteneixe a o Col·lectiu Esquella y treballa, entre atras cosetas, por a conservación d’a Ovella Guirra (raza d’ovella autoctona valenciana), recientment ha creyau o prochecto Esquellana, de recuperación y mesa en valor d’a lana d’a Ovella Guirra; Amanda Tyson (@ChistauNatural), ganadera en Chistau Natural, un prochecto familiar de cría de terneras a pasto y venda directa d’o producto final; Ganaderas en Ret (@GanaderasenRed), grupo de ganaderas y pastoras en extensivo, a suya gran labor visibilizando o treballo d’iste colectivo les ha feito merecedoras d’o Premio Extraodinario d’Excelencia a la Innovación de Mullers Rurals, atorgau por o Ministerio d’Agricultura y Pesca, Alimentación y Medio Ambient; Lucía Mur (@meteosaravillo), aficionada a la meteorolochía, Lucía nos da diariament o parte meteorolochico dende o suyo lugar, Saravillo (Uesca), a traviés d’o suyo blog, d’a suya pachina de facebook y o suyo twitter; Blanca Ruibal (@BlancaRuibal), incheniera agronoma y pianista, dende a Sierra Oeste de Madrit coordina l’aria d’Agricultura y Alimentación d’Amigos d’a Tierra; Celsa Pleiteado (@CPeiteadoWWF), incheniera agronoma y coordinadora de Politica Agraria y Desembolique Rural en WWF Espanya; Inés Jordana (@IJordana_RD), responsable d’Agricultura y Alimentación en SEO Birdlife; Veru Álvarez Cachafeiro (@Veru_Alvarez), cheologa, emprendedora y autora d’o blog Lláscara, an que escribe sobre ecoturismo, educación ambiental, sostenibilidat, desembolique rural y muitas cosetas mas; Elisa Bagüés (@Elibagues), responsable de Marketing y Comunicación en Agromonegros y autora d’o blog Agrocomunicando, an que analisa a comunicación agraria; Mar Verdejo Coto (@verdejomar), Incheniera Tecnico Agricola y comunicadora en radio y prensa escrita; Fyna Acebo (@sacarico9), luitadora incansable por o medio rural; Natalia Manso de Zúñiga (@NataliaMdeZ), cheografa, a traviés d’a suya cuenta de twitter observa paisaches rurals.

Como he comentau, antes que no existisen os retz socials, buscaba ixes referents en os libros. A mía escritora favorita, a qui admiro fundament, ye Emilia Pardo Bazán, autora, entre atras obras, d’Os Pazos d’Ulloa y A Mai Naturaleza, dos novelas ambientadas en o medio rural gallego d’o sieglo XIX. Emilia vivió en una epoca en a quala no yera bien visto que una muller escribise, y menos encara, que escribise sobre qualsiquier coseta. O suyo hombre recibió multiples ataques por os textos d’Emilia, y temendo que identificasen a Emilia con o personache femenín, valient y revolucionario d’a suya novela A tribuna, le pidió que deixase d’escribir, cosa a o que Emilia se negó y decidió deseparar-se d’o suyo hombre. Emilia Pardo Bazán estió una firme defensora d’os dreitos d’as mullers y dedicó a suya vida a luitar por ells.

En a literatura en aragonés, me costó mas trobar ixes libros de mullers defensoras d’o medio rural, tot y que ye una literatura eminentment rural y femenina, manimenos, encara a día de hue se visibiliza masiau poco a las mullers que escriben en iste idioma y, amás, en haber aumentau o numero d’hablantes en as ciudatz, a o mesmo tiempo que ha disminuyiu en os lugars, pareixe que cada vez s’escriben menos obras ambientadas en zonas rurals. Manimenos, a literatura en aragonés se puede caracterizar, como diciba, en seguir estando precisament rural y femenina. A obra mas relevant en aragonés d’o Barroco, ye a que deixó escrita Ana Abarca de Bolea. Y ya en epoca moderna, no podemos pasar por alto que o libro con mas eixemplars vendius ye A Lueca, escrito por Chuana Coscujuela, an que l’autora narra a suya infancia y choventut en un lugar d’o Somontano de Barbastro (Uesca) a prencipios d’o sieglo XX. No podría charrar d’a literatura aragonesa sin mencionar a atras dos grans escritoras, tamién rurals, como son Carmen Castán, escritora y profesora d’aragonés en a Val de Benás, y Ana Tena Puy, escritora y ganadera.

Filanderas de Panticosa

En iste articlo he mencionau solament a qualques d’as muitas mullers que treballan cada día por o medio rural, y m’he deixau a aquellas que no son en o mundo dichital pero de qui tanto he aprendiu.

O teixiu d’o medio rural se sostiene gracias a las mullers, y hemos d’estar nusatras mesmas qui sigamos teixindo retz ta inspirar-nos, creixer y seguir caminando, porque o día en que deixemos de caminar, o medio rural plegará en o suyo final.

Feliz día a todas as mullers rurals, iste articlo va por todas vusatras.

Tags :