En os territorios ocupaus por a vaca frisona

Rescato iste articlo publicau o día 20 de setiembre de 2014 en Enfocant, titulau En os territorios ocupaus por a vaca frisona. Ta leyer l’orichinal puncha aquí.

pasiega1
Eixemplar de vaca pasiega en una finca d’o Gubierno de Cantabria en Gama

A día de hue, cuesta creyer que i habió un tiempo, allá por o sieglo XIX, en o qual os cantabros s’instoloron con as suyas vacas pasiegas en ciudatz como Madrit, Barcelona u Bilbao ta satisfer a demanda de productos lacteos que empecipiaba a haber en as grans ciudatz.

Actualment, Cantabria sigue estando conoixida por a suya producción de leit, con a diferencia que as suyas rojinas autoctonas se troban en periglo d’extinción, habendo-se dau por desapareixidas mientras muitos anyos, y as autoridatz no pareixen tener intrés en conservar-las.

Puede que a la chent le pareixca normal que os praus de Cantabria, igualcomo os d’Asturias, Galicia y de gran parte d’o mundo, sían pastaus prencipalment por as “tipicas” vacas pintas, ixas que salen en os anuncios de Nestle y de l’Asturiana, pero qué atractivo tiene veyer o mesmo paisache en Cantabria, EEUU u Irlanda?

Quantas preguntas arredol d’a vaca frisona

Ye inquietant pensar qué pasaría si amaneixese una malotía a el qual a vaca frisona, por a suya chenetica, ise especialment sensible como ye pasando en EEUU con o sector porcino. Tamién caldría preguntar qué tiene d’especial una quesada pasiega elaborada con leit d’a mesma vaca que a que s’usa en una tarta de queso alemana u un sobao elaborau con a mesma manteca que un bizcocho holandés.

O que pasa quan se pierden razas autoctonas ye que con ellas se pierde a suya chenetica, adaptada y especializada mientras sieglos a l’ecosistema en o qual habita. Garra vaca frisona, por muito que se seleccione plegará a adaptar-se a os praus cantabros como lo son as vacas pasiegas. Amás, quan se pierde una raza, se pierde a cultura ligada a ella.

No solament os sobaos y as quesadas se feban orichinalment con productos derivaus d’a leit d’istas vacas, sino que l’autentico queso de nata se feba con leit de vacas pasiegas.

Si dimpués de leyer isto les apetece probar un autentico sobao u quesada u queso pasiegos, no s’emprenyen, no lo van a trobar. Agora mesmo i hai en tot lo mundo una sola ganadería que tienga un rabanyo completo de vacas pasiegas y vende toda a leit que produz a la interpresa Láctalis-Puleva, con siede en Galicia. En a central, ista leit se mezcla con leit procedent d’atras ganaderías, y se distribuye por o Estau espanyol como leit ecolochica de Galicia.

Pasividat institucional

Vacas Pasiegas d'a ganadería d'Áurea Quintial
Vacas Pasiegas d’a ganadería d’Áurea Quintial

Sobre as medidas tomadas por as autoridatz cantabras ta empentar ista raza autoctona, en l’aspecto divulgativo cal destacar a publicación d’o libro En el País dela vaca pasiega de aEditorial Cantabria Tradicional, dificil de trobar en librerías fisicas de Cantabria, pero adquirible por internet a o pre de 34€ mas gastos de ninvio.

Dende o punto de vista scientifico, en o CIFA (Centro d’Investigación y Formación Agroalimentaria de Cantabria) no se ye levando a cabo garra prochecto en relación con a vaca pasiega porque “no intresa”. Por unatro costau, o Gubierno de Cantabria disposa d’una finca experimental en Gama an que han feito estudeos comparativos entre a vaca frisona y a pasiega y en o qual advierten textualment que “cal destacar que as pasiegas controladas proceden de rabanyos maniaus en as mesmas condicions que o frisón lechero, isto ye, as vacas no salen t’o mont”. Tot y que o maneo no sía o propio d’as rojinas, os estudios sinyalaban una diferencia significativa en o porcentache de proteina, estando de 3,04 en as frisonas y de 3,16 en as pasiegas. O porcentache de proteína ye important t’a producción quesera.

Unatro punto curioso d’o estudeo, en o qual se charraba d’as tres vacas autoctonas de Cantabria, ye que en as fotografías tanto a tudanca como a monchina amaneixeban retratadas en o suyo meyo natural, mientres que en l’apartau d’a pasiega amaneixeba por un costau una fotografía d’un eixemplar, y contino unatra de l’ecosistema en o qual se crían, feito que seguntes ells mesmos se debe a que carecen d’imachens de vacas pasiegas en o suyo meyo natural.

Cal sinyalar que a citada finca de Gama naixió como centro de cría de vacas frisonas. L’obchectivo yera adquirir eixemplars de buena chenetica ta fer-los criar y distribuir as nuevas cheneracions entre os ganaders d’a zona. Finalment iste prochecto no triunfó y tiempo dimpués tomó a suya actividat actual.

Por o que fa a incentivar a os ganaders ta que críen ista raza, os esfuerzos dende o Gubierno cantabro se podrían qualificar de nulos, ya que a sola aduya que dan a las asociacions de productors de razas autoctonas en periglo d’extinción ye por tener dica siet animals, por o que beneficia a aquells ganaders de vacas pintas que adquieren un u dos eixemplars de pasiegas ta recibir a subvención y perchudica a qui tienen tot o rabanyo rojino. Asinas s’explica que a calendata de 31 d’aviento de 2013 i hese en Cantabria 353 fembras reproductoras de vaca pasiega repartidas en 77 ganaderías. Si tenemos en cuenta que a ganadería d’Aurea Quintial cuenta con 30 eixemplars, nos sale a poco mas de 4 animals por explotación, entre os quals se troban tamién Fincas Publicas. Istes datos deixan a la pasiega en una posición insignificant en o marco d’a ganadería lechera cantabra si la comparamos con os datos que se tienen d’a mesma calendata d’a vaca frisona, que tiene, solament en Cantabria, 44.747 eixemplars repartius en 861 ganaderías (sale una meya de 52 animals por explotación), seguntes datos d’o Ministerio d’Agricultura, Alimentación y Meyo Ambient d’o Gubierno d’Espanya.

 

Vaca Pasiega d'a ganadería d'Áurea Quintial
Vaca Pasiega d’a ganadería d’Áurea Quintial

A vaca pasiega: a vaca d’o futuro?

Seguntes os datos anteriorment exposaus, en Cantabria por cada vaca roya nos trobamos 127 vacas pintas. Veyendo isto, mas d’un pensará que o destín d’a raza lechera cantabra por excelencia ye desapareixer. Manimenos, podría estar a clau t’o desembolique d’a ganadería d’o futuro, d’a ganadería sostenible:

A Unión Europea ha manifestau as suyas intencions de rematar con as condutas lacteas o proximo anyo. De levar-se a cabo, significaría que totz os ganaders podrían producir a cantidat de leit que queresen, por o qual os grans producirían immensas cantidatz, tirando os pres por os suelos y fundindo a os chicotz productors. Ye por isto que os chicotz habrían de buscar diferenciar-se: si chugas en unatra liga no t’afectan os partius d’os de demás. O futuro podría estar en a transformación, pero no en una transformación qualsiquiera, sino en una diferenciada, de calidat y prou que tradicional, an que se recuperen os autenticos quesos de nata elaboraus con vaca pasiega, asinas como sobaos y quesadas de verdat. En un territorio como Cantabria, an una d’as prencipals fuents d’ingresos ye o turismo, ye mesmo necesario l’ofrir productos locals a os visitants, encara que o mas important ye concienciar a os paisanos d’a importancia de conservar os recursos d’a zona y o papel que istes chugan en a cheneración d’emplego.

A muitos les cuesta creyer-lo, pero os datos de control lechero no enganyan, a unica ganadería 100% pasiega de Cantabria produz con un manullo ecolochico una meya de 28 litros diarios por vaca, realizando dos ordeños a o día. A os animals se les alimenta tot l’anyo a pur de pastos naturals plagaus de flora arvense autoctona y se les aporta una chicota cantidat de cereal certificau ecolochico. D’hibierno les ne suministran de silo elaborau en ixas praderas naturals. Amás, a propietaria, y unica treballadora d’a ganadería, asegura no recibir a subvención d’a PAC (Politica Agraria Comuna) y que puede vivir con os ingresos que tiene.

Iste manullo choca con o qual realizan muitos ganaders cantabros, que crían frisonas en intensivo, an que as vacas no salen t’o prau y se les aporta o silo en a gribia y gran cantidat de piensos, tot transchenico y produciu con productos quimicos. Amás realizan 3 muyidas diarias (una mas d’o normal, o que embreca mayor estrés t’os animals y mayor aporte alimenticio) dando una meya de 38 litros diarios por animal y aseguran que sin l’aduya d’a PAC no podrían salir abance. Un d’os prencipals problemas d’iste tipo de ganadería ye a gran cantidat de gases d’efecto invernadero que emite a causa d’os desechos d’os animals, os fertilizants y pesticidas usaus ta producir ferraina asinas como o combustible usau ta transportar os distintos elementos d’a cadena agroalimentaria. Por unatro costau, iste tipo de producción ye dreitament dependient d’os cereals y granos proteicos transchenicos, t’os quals qualques países europeus ya han establiu restriccions u prohibicions. Mesmo o propio Parlamento y a Comisión Europea son reclamando o fomento d’una ganadería tradicional, respectuosa con o meyo y lo mas independient posible, que valore a las vacas por a calidat d’a suya leit y no por os litros u a cantidat de grasa que producen, y que torne a os remugants a suya capacidat d’obtención de proteína sin necesidat d’utilizar en a suya dieta alimentos transchenicos producius a costa d’arrasar con a chungla en o continent americán.

O modelo lechero a seguir ye aquí, pero ameneste l’emparo de todas ta sobrevivir. Talment, invertindo en modelos de producción sostenibles, en un futuro podamos tornar a referir-nos a Cantabria como o país d’a vaca pasiega.

Tags :