La Riada empecipia a abanzar
Lucía
22 mayo, 2019
O pasau 2 de Marzo, un grupo de mas de 100 personas de tot Aragón se reunioron en Burbaguena (Teruel) con o proposito de configurar un ret d’emparo mutuo y coordinación de politicas locals, en un momento en o qual a os lugars y as comarcas rurals, mas que no nunca, les calen estratechia y organización ta sobrevivir. Dos meses y meyo dimpués, son muitas as personas que, intresadas por iste movimiento s’han meso en contacto con o Ret Riada con l’obchectivo claro y a voluntat decidida de treballar ta ixe Aragón diverso y disperso que quasi siempre s’ixuplida.
Gracias a la participación y o treballo de todas istas personas, dende A Riada anuncian a calendata y o puesto d’a II Trobada d’o ret, que se celebrará o 15 de Chunio a las 11:00 en o concello de Mezquita d’Exarc (Cuencas Mineras, Teruel), coincidindo con o festival de Mosica en a Carrera O Taborilé .
Dende a organización sinyalan que consideran que a calendata de l’evento, un mes dimpués d’as eslecions, suposa una oportunidat ta os representants municipals electos de dotar-se un programa politico centrau en lo concreto d’o que podrán pillar librement o que quieran y a o que podrán aportar o que estimen convenient. Amás, será una forma d’obtener d’atros en a suya mesma situación aduya directa ta o día a día d’os concellos, independientment d’as distintas formacions politicas.
S’anima a todas as personas que quieran treballar por os suyos lugars a asistir a la trobada, y se recuerda que, ta inscribir-se en a chenta, cal con replenar o formulario disponible en LaRiada.org . O pre será de 10€ y pueden trigar-se-ie distintas opcions.
Encara que iste movimiento, orichinau en Aragón y sin precedents en atros territorios, acaba d’empecipiar, se tiene a determinación de continar celebrando as trobadas d’a Riada con caracter semestral y itinerant, cada primavera y cada agüerro en un lugar distinto d’Aragón y intentando coincidir con eventos culturals u fiestas populars que se quieran empentar y meter en valor. En ells se darán a conoixer los abances y logros d’o ret y s’aprofitará ta treballar presencialment amás de ta fortalecer os lazos personals y enamplar o propio ret.
Muito intresán, Lucía. Fa tiempo que treballo sobre ista custión dende o Parlamento Europeu (en soi asistén local) y soi desarrollando una azión de larga remetida ta que as politicas y fondos europeus, d’os que penchan as politicas correspondiens españolas, identifiquen os problemas demograficos y de desarrollo d’as zonas rurals más frachils y espoblatas y diseñen midas d’autuazión y condizions de finanziazión apropias.
Agora se son negoziando istos fondos y anque s’han aconsiguito avanzes en as emiendas feitas en primera leutura por o Parlamento Europeu, queda encara muita negoziazión por debán.
He teníu a oportunidat de conoxer y refirmar á os lobis que luitan por aconsiguir ixe oxetivo, entre os que quiero estacar o rete d’Arias Espoblatas d’o Sur d’Europa (SSPA, en anglés) en o que s’han organizato ras organizazions interpresarials y grupos d’azión local de Teruel, Cuanca y Soria y también colaboro dende l’año 2001 con Teruel Existe y, más rezienmén, con a Plataforma de Defensa del Ferrocarril de Teruel. Tamién soi ponén abitual de foros como El Hueco (Soria).
Bien, tot isto ta dizir que m’intresareba muito fer una presa de contauto con La Riada.
Si podeses dar-me bella informazión sobre l’orichen d’a ideya y os oxetivos que tiene antiparti d’o que he puesto leyer en a suya web, t’estareba pro agradexito.
Reculle as mías esprisions cordials
Muitas gracias Miguel. En breus se meterá en contacto con tú un d’os coordinadors d’o rete y te dará más información.
Abrazos,
Lucía
Grazias á tu. Que vaiga bueno.