O secreto ye en o queso

Articlo publicau o 4 de febrero en a sección ‘La Braña’ d’Eldiario.es Cantabria.

Acabo d’ubrir o Facebook y lo primer con o que me trobo ye un post en o qual amaneixe a fotografía d’una carta ninviada por una industria que fabrica queso ta una conoixida cadena de pizzerías. En a carta, a interpresa lactea anuncia a os suyos proveyedors que t’o nuevo periodo (que prencipia o 1 d’abril d’iste anyo y remata o 31 de marzo de 2017), pagarán a leit a “un pre base de 0.25 €/litro”, y amás, adhiben, “o compromiso de volumen será o mesmo que o contractau en a campanya 2015/2016”.

A carta contina, y a interpresa chustifica a baixada d’o pre de compra alegando que o queso que producen “ye fabricau tamién por atros competidors en o norte d’Europa, an os pres d’a leit son muito mas baixos que no en Espanya, por tanto nos veyemos forzaus a actualizar os nuestros pres de compra ta poder estar mas competitivos siempre intentando dar prioridat a os nuestros proveyedors de confitanza”.

A verdat ye que lo leigo y no doi credito. Si a interpresa querese dar prioridat a os suyas “proveyedors de confitanza”, digo yo que se miraría d’elaborar un producto diferenciau, local, distinto d’o que pueda producir unatra industria en Suecia, y de calidat, de traza que en cuentas de vender-lo en una interpresa de pizzas que paga poco y malament a os suyos emplegaus, y que paga poco y malament por ixe queso; se podese servir en restaurants que ofreixen “quesos d’o país”.

Pero no. O feito que “fabriquen” quesos en cuenta de producir-los ya da ideya que o suyo producto ye 100% artificial, tant artificials como pueden pareixer as ganaderías que les ne suministran, porque si s’estima que producir un litro de leit cuesta entre 34 y 38 centimos, cómo puede estar que les ne sían pagando solament 25? Pus ye posible gracias a que a l’atro anyo o Ministerio aprebó un paquete d’aduyas de 20 millons d’euros destinadas a aquellas ganaderías que reciben menos de 0,285€ por cada litro. Ye dicir, que en cuenta d’obligar a industria y distribución a guarenciar o pago d’os costes de producción, dende o Ministerio de Tejerina o que primó estió que a industria pague o pre que estime, y d’entre totz i metemos o que falte.

O problema, en realidat, no ye qui paga o queso, o problema ye muito mas complexo, porque a baixada de pres no ye que una sincusa ta deixar de comprar a leit a las chicotas ganaderías tradicionals, que dillá de producir leit, fixan población a o territorio y conservan l’ecosistema. Qué pasaría si de rapiconté o sector decidise deixar de comprar leit a todas as torres familiars d’a cornisa cantabrica? De qué vivirían ixes lugars? Pus ixo ye lo que ye pasando: dende a desaparición d’as condutas lacteas, a distribución prefiere comprar o producto a explotacions industrials de gran grandaria situadas en o sud peninsular, an no i hai pasto pero sí os cereals con os qual se fabrican os piensos d’os quals s’alimentan ixas vacas; y an, amás, concentran toda a producción en pocas macrotorres bien situadas y no han d’ir casa por casa ta replegar chicotas cantidatz. Muito mas comodo t’a distribución, pero un serio problema t’o medio rural.

Contino baixando por o muro de Facebook y me trobo unatra noticia: O sector lacteo anuncia l’encieto d’un ‘duro boicot’ a Lactalis. Millor no sigo leyendo, no vaiga a estar que m’entere de cosas que no debo y quan vaiga a encargar unas familiars m’arrepienta en recordar que o secreto no ye en a masa, o secreto ye en o queso.

Tags :