Tirando d’o filo d’a sustentabilidat

(Foto: Laneras)

Laneras ye un prochecto que busca recuperar a raza merina negra y os sabers tradicionals de forma sostenible ecolochica y economicament a partir d’a producción de lana ecolochica. Ta ixo s’han uniu ganaders, artistas y profesionals.

En a cooperativa ACTYVA manean quantos rabanyos de merinas, raza conoixida por a gran calidat d’a suya lana, baixo condicions sostenibles y/u ecolochicas. Manimenos, a producción de lana en a Peninsula Iberica ha pasau d’estar a mas important d’o mundo, a estar bella cosa residual. De feito, dica fa quantos anyos, valeba mas o transportar y esquirar a las ovellas, que a lana en ella mesma. Por ixo, dende Laneras, han decidiu dar-le valor adhibida a o producto, procesando a lana d’istas ovellas con productos biodegradables ta meter a la disposición d’os usuarios y tallers artesanals lana lavada, escarmenada, cardada y filada con a quala teixir u afieltrar ta recuperar o “con-tacto” con as fibras naturals entre que s’empara a las ganaderías que son restaurando os pastos, defesas y olivars d’Extremadura.

(Foto: Laneras)

Amás de proveyer d’a lana virchen en distintos graus de procesau, tamién son preparando un programa formativo, guía y cintas didacticas ta entidatz socials sobre afieltrau y filau con a finalidat de promover l’uso de fibras naturals y a recuperación de sabers ancestrals en a producción d’utils domesticos, complementos y vestiu que podesen dar puesto a oportunidatz d’autoemplego.

Si queretz colaborar con o prochecto, Laneras busca mecenas t’a suya campanya de crowdfunding, con a quala podetz colaborar punchando aquí. Colaborando, seretz aduyando a revalorizar a lana como patrimonio historico, cultural, social y economico; a empentar a producción y consumo local textil; y a estendillar y amanar a la sociedat a las conoixencias arredol d’a lana y a suya producción, transformación, confección, tecnicas y posibilidatz ta treballar con ella revitalizando lazos socials y rechenerando os ecosistemas. Animar-tos a tirar d’o filo d’a sustentabilidad! 🙂