Ya ye aquí o numero 2 d’a Revista Mallata!

Ha pasau muito tiempo, muito mas d’o deseyau y de l’asperau, dende a publicación d’o numero 1 d’a Revista Mallata. Asinas que, en primer puesto, quiero pedir disculpas por iste retardo.

Iste numero 2 d’a Revista Mallata, a primera revista dichital gratuita de tematica rural escrita solament por mullers y disponible en castellán y en aragonés, ye centrau en mullers y iniciativas con base en Aragón. Creyeba necesario meter o foco en lo cercano y dar voz a grans mullers que tiengo a suerte de tener muit amán, y fer un numero lo mas Km0 posible.

En ista ocasión, a portada ye obra de l’artista Inés Alba. O numero replega os testimonios de Natalia Manso de Zúñiga Pallarés, qui comparte a suya experiencia de marchar a vivir t’Ansó (Uesca); María Pulido nos charra de cómo decidió deixar Madrit pa acabar en Artieda (Zaragoza) y d’o prochecto “Empenta Artieda” pa fixar población choven en ista población d’o Pireneu Aragonés. Rosa Roca nos charra d’o prochecto “Avielleix en o tuyo lugar” que dende Senderos de Teja son empentando en os lugars zaragozans de Salvatierra d’Escá, Mianos, Artieda y Sigüés. Patricia Escartín relata a suya experiencia como medica rural en tiempos de Covid19 un chicot lugar d’o Pireneu de Uesca; as Biela y Tierra (Edurne Caballero y Ana Santidrián) nos narran o suyo final de rota; y charramos con Isabel Félez, qui nos presienta “Chocolates Isabel”, a unica chicolatería artesana, ecolochica y de comercio chusto, con obrador en Alcorisa (Teruel). Amás charramos de teletreballo y 5G en tiempos de Covid; conoixemos dos documentals realizaus por mullers d’a tierra: ‘Soñando un lugar’ (Soneando un lugar) de Lucía Camón y ‘Parir en el pueblo antes de 1970. Relatos de mujeres de Lécera’ (Parir en o lugar antes de 1970. Relatos de mullers de Lécera) d’Elisabeth López Orduna; y presentamos o mapa d’iniciativas impulsadas por mullers en o medio rural. Tamién compartimos por aquí a historia de SuperMarta, a ovella heroína, ilustrada por Pilar Serrano, y os dibuixos d’@s participants en o concurso “Dibuixa a SuperMarta”.

Sisquiera l’aspera haiga valiu a pena y desfrutetz d’a lectura!

Puetz descargar a revista punchando aquí.