Tornando t’o futuro con a Sobiranía Alimentaria

Orduña/Urduña ye un municipio de 4.000 habitants en Vizcaya que s’heba dedicau siempre a l’agricultura y a ganadería, dica que plegó a industria y a producción intensiva d’a Tierra y con ellas, o zarre de muitas explotacions familiars. Un buen día as chents d’Urdunya decidioron dar un cambeo a o suyo proceso productivo comprometendo-se con l’agroecolochía y a Sobiranía Alimentaria.

En iste documental de 20 minutos realizau por Veterinarios Sin Fronteras – Justicia Alimentaria Global y Urduñederra, s’explica cómo ha estau iste proceso de cambeo enta l’agroecolochía, y cómo ha cambiau, no solo que a forma de producir, sino tamién a forma de relacionar-se y de treballar d’os suyos vecins, asinas como a suya calidat de vida.

Iste prochecto, ha aconseguiu tamién que cada vez pleguen “mas turistas a Urdunya ta conoixer os productos d’a suya tierra”, tal como afirman dende a Usina de Turismo d’a localidat, y que en a escuela, as ninas y ninos sían concienciaus sobre l’orichen, a forma de producción y a biodiversidat d’os alimentos. Pero no solo que ixo, con iste treballo a ixena tamién han aconseguiu que os alimentos que se sirven en as fiestas d’o municipio sían d’a propia localidat, y han puesto organizar o Bertzo Bazkari Ekologikoa, an s’unen diversos colectivos reivindicando a cultura, l’idioma y l’agroecolochía.

D’atra man, en o 2011 se sinyó una Declaración institucional emparada por todas as fuerzas politicas con representación en o Concello, que manifiesta que Urdunya ye una localidat “compromesa con a construcción d’a Sobiranía Alimentaria y a esfensa d’a Biodiversidat”.

Sisquiera iste gran treballo d’as chents d’Urdunya sía solo que o prencipio d’un gran ret de municipios que decidan achugar por unatro modelo de producción y de vida.

Ta mas información, podetz visitar a pachina web http://regresandoalfuturo.org/