Arredol de cient personas acudioron o martes 31 de marzo, a la chornada sobre ganadería ecolochica celebrada en Boltanya organizada por a Usina Comarcal Agroambiental de dita localidat.
Mientras a chornada, profesionals d’a ganadería podioron resolver dubdas respective a o maneo, a certificación y as aduyas d’o Gobierno d’Aragón en ganadería ecolochica.
Andrés Ballestín, d’o Departamento d’Agricultura d’o Gobierno d’Aragón, comentó, referindo-se a las aduyas ta ganaderías con certificación ecolochica, que “qui quiera dentrar-ie, que intente fer-lo iste anyo, porque a l’atro’l anyo no tiengo claro que pueda”. Amás, amostró a falta de claridat en qualques puntos d’a lechislación. Respective a o Greening y a doble financiación, aclarió que l’Articlo 43 d’as aduyas Agroambientals sinyala que no puede recibir-se doble financiación, y sobre Agricultura y Ganadería Ecolochicas, o zaguer párrafo de l’articlo 29 indica que s’excluye a doble financiación, encara que, en parolas d’o tecnico, “no diz cómo”.
![[cml_media_alt id='164']Andrés Ballestín, del Departamento de Agricultura del Gobierno de Aragón, habló de los condicionantes en las ayudas a la ganadería ecológica.[/cml_media_alt]](http://mallata.com/wp-content/uploads/2015/04/andres.jpg)
Un d’os puntos que mas polemica suscitó entre os asistents, fuo o relativo a a normativa de producción ecolochica que indica que os productos procedents d’animals que sían en puerto de conchunta con bestiar d’explotacions no certificadas, no podrán levar o sello en a venda, si no que, en o caso, por eixemplo de terneros, istes han de pasar un periodo de tiempo no especificau en un puesto certificau “ta tornar a estar ecolochicos”. Medida que en parolas d’Isabel Casasús, investigadora d’o Centro d’Investigación y Tecnolochía Agroalimentaria “no tiene garra explicación, y amás no ye claro ya que no especifica qué periodo de tiempo s’ameneste t’a reconversión. Pero ye o que replega a normativa y dica o momento no ha resultau garra problema ta garra ganadero”.
a mesa redonda con ganaders estió, sin dubda, l’empentón final que convenció a mas d’un a dar o paso definitivo ta pasar-se a la producción ecolochica, ya que o maneo no dista guaire de l’habitual en a ganadería de montanya. Encara que si en bella cosa insistioron totz os ponentes, prencipalment os ganaders estió en que, “no cal fer-lo por a subvención, porque saldrá malament. A ganadería ecolochica cal practicar-la por convicción”.
