Sobrarbe ye una comarca situada en o Pireneu Aragonés, an que a ganadería extensiva ha teniu siempre una gran importancia tanto dende l’anvista economica, como en a configuración y mantenimiento de l’ecosistema. Manimenos, a producción industrial de carne, ye metendo en periglo ista actividat milenaria, y, de seguir asinas, a economía local y l’entorno, podrían veyer-se menazaus. Ta privar que isto succeda, y ta incentivar o consumo de carne local, l’Asociación Aragonesa de Criadores de Ganado Vacuno Pirenaico (ASAPI), a Fundación para la Conservación del Quebrantahuesos (FCQ), a Facultat d’Albeiteria d’a Universidat de Zaragoza, o Concello de L’Aínsa-Sobrarbe y l’Asociación Empresarial Turistica de Sobrarbe, participan en o prochecto “Sobrarbe Autoctono y Sostenible”, aprebau en o marco d’o Programa de Desembolique Rural (PDR) ta Aragón 2014-2020 y dotau con 60.000 €.
Os obchectivos d’o prochecto “Sobrarbe Autoctono y Sostenible” son a promoción y difusión d’o concepto d’a carne “de km zero” en os colechios, instituto, asociacions de consumidors, centros de promoción turistica, carnicerías, locals dedicaus a restauración; a realización d’un curso de formación sobre despiece y nuevos cortes y nuevas presentacions; concurso y promoción de recetas (locals y provenients d’atros puestos) aplicables a la carne de vacuno; caracterización d’a carne de vacuno pirinenco d’o Sobrarbe; estudeo comparativo con atras carnes; promoción d’o matadero comarcal; desembolique d’un carné asociau a o consumo de carne de vacuno local en restauración; empentar o comedero d’aus necrofagas de L’Ainsa-Sobrarbe; evaluar a sostenibilidat integral (economica, social y medioambiental) d’as explotacions de vacuno de raza Pirinenca localizadas dentro de Sobrarbe; analisar as actitutz u opinions d’os diferents achents d’a cadena de valor local de carne de vacuno Pirenaica, dende o productor dica o consumidor, sobre l’acabau de terneros y a producción de carne.
Ta conoixer mas sobre iste prochecto, no te pierdas o reportaje sobre aus rapaces que emitioron en Tempero, programa d’Aragón Tv.
