Cabalero. Un viello pastor d’o Pireneu

Iste mes d’aviento ha visto a luz a reedición d’un libro unico y imprescindible ta todas as personas intresadas en a ganadería extensiva y l’etnopastoralismo, se tracta de Cabalero. Un viello pastor d’o Pirineo, escrito por Enrique Satué y reeditau por PRAMES. Ista obra ye o resultau d’una larga relación d’amistat y aprendizache entre un pastor tradicional de l’Alto Aragón y un estudioso d’a Etnohistoria, y en el se desgrana l’universo personal d’Antonio Oliván Orús, de Casa Cabalero d’Aso de Sobremont (Alto Galligo), como depositario d’a esencia d’a sociedat agro-ganadera tradicional d’o Pireineu. En ista edición amillorada y enamplada s’ha incluyiu tamién una introducción en a quala s’analisa a situación actual d’a ganadería extensiva en o Pireneu, trenada sobre a base de quantos testimonios de pastors y albeitars.

En o Sistema d’Información d’o Patrimonio Cultural Aragonés (SIPCA) se pueden escuitar 52 gravacions d’Antonio Oliván feitas por Enrique Satué.

Contino tos deixo con qualques pachinas d’o libro.

Dedicatoria d’Antonio Oliván Orús “Cabalero” t’a primera edición d’o libro, en a quala se puede leyer “Iste libro les ne dedico particularment a os chovens, pa que vaigan mas t’o mont y tiengan aficion a os animals que t’amuestran muito y ye una vida muit sana y feliz que se metan a cudiar ovellas, que ya i hai muitos advogaus y politicos y medicos y faltan pastors. Antonio Oliván”.

Indice de Cabalero. Un viello pastor d’o Pirineo. O libro ye agrupau seguntes tematica en seis grans bloques: O pastor, o ciel, a tierra, o rabanyo, os de demás y o camín. Amás s’incluye una sección titulada “chunto a o fogaril” que incluye quantas conversacions transcritas entre Antonio Oliván y Enrique Satué; unatro apartau de vocabulario; l’epilogo “Pastors d’o Pireneu” y bibliografía ilustrada.

Representación grafica d’o ciclo pastoril d’o Prepireneu que transuaba t’a Val de l’Ebro.

Cubillars pastorils, a la cucha en puertos estivals (mallatas) y a la dreita en tierra baixa (parideras).

Mención a iste blog en o prologo a la edición de 2017.

Cronolochía:

1923
Naixe Antonio Oliván Orús en una familia humil d’Aso de Sobremont (Casa Cabalero). Dende nino dica a suya chubilación va a a dedicar-se a la ganadería extensiva.
1982
L’autor conoixe a Antonio o 22 d’agosto de 1982, en un arcaico cubillar pastoril u mallata d’o Portalet. Quan se i veyen, Antonio s’ocupaba d’a cabana d’o suyo “amo” y d’atros ganaders d’a val. Asinas naixe una amistat y a posibilidat de conoixer y comprender o viello mundo d’os pastors d’o Pireneu.
1983
O 10 de setiembre, chunto a José Luis Acín Fanlo, l’autor visita a Antonio en o puerto d’Aso de Sobremon, en a mallata de Laguarre. Dos intensas chornadas sirven ta redactar un articlo en a revista “Temas d’antropolochía aragonesa”, nº 2. Dende aquella calendata Antonio pasa a estar, practicament, un miembro d’a familia de l’autor.
1995
Prencipian as reconoixencias a Antonio. O 15 d’agosto de 1995 pronuncia o pregón d’as fiestas patronals de Biescas.
1996
En noviembre se presienta l’autoedición d’o libro. Se fa en o fogar de Casa Cabalero, y bi son presents: Antonio, Enrique Satué, un grupo d’amigos y a periodista Soledad Campo. A partir d’ixa calendata, tienen puesto varias charradas en bibliotecas, museus y asociacions culturals, man a man entre Antonio y Enrique Satué.
2000
O 21 d’octubre, en Biescas, Antonio recibe a “Gayata d’honor”, dentro d’a IV Chornada realizada sobre “Pastoralismo y transuancia”.
2007
O 7 de chunio fenece Antonio en a residencia Santa Orosia d’as “Hermanitas de los ancianos desemparados de Jaca”.
2017
O SIPCA (Sistema d’Información d’o Patrimonio Cultural Aragonés) pencha en a suya plataforma os quasi 3000 testimonios orals que Enrique Satué replegó por o Pireneu dende 2003 a o 2010 y que han dau piet a escribir o libro Siente. Testimonios de aquel Pirineo. Entre ells amaneixen 52 producius por Antonio. Chiran, fundamentalment, arredol d’a infancia tradicional y o mundo pastoril.
O 9 d’aviento se presienta una edición amillorada d’a edición de 1996. A edición corre a cargo de PRAMES S.A.
Os dreitos d’autor, tenendo present a cosmovisión que poseyeba Antonio, se destinan a la Fundación Juan Bonal (Chirmanas d’a Caridat de Santa Ana), que atiende o minchador escolar de Machacamarca, en o departamento d’Oruro (Bolivia). Ditos fundos se vincularán, en particular, a l’apadrinamiento nº 258400.
Pa obtener mas información sobre a institución benefica se pueden consultar as pachinas www.fundacionjuanbonal.org y www.padrinos.org.

Án comprar-lo?

O libro se puede comprar en as prencipals librerías d’as provincias de Uesca y Zaragoza y online a traviés de diferents librerías, como PRAMES, Librería Castillón y Librería Central.