I Semana d’a Sostenibilidat en Binefar

A semana que viene se celebra en Binéfar a I Semana d’a Sostenibilidat, organizada por o concello d’a localidat. De luns a domingo tendrán puesto en o municipio lliterano diversas actividatz arredol de distintos temas relacionaus con a sostenibilidat ambiental, como l’agricultura rechenerativa, o decrecimiento, a biodiversidat, as enerchías renovables u a chestión de residuos urbans.

Entre o desembolique d’as chornadas se contará con a presencia d’especialistas en as diferents arias indicadas, como Luiz Carlos Pinheiro, qui amás de participar o día 7 en a conferencia “Producción d’alimentos saludables sin labranza ni venenos”, impartirá o día 8 o curso “Introducción a la cría de cerdos a campo”; Fco. Javier Citoler, decano d’o Colechio d’Incheniers Agronomos d’Aragón, Navarra y País Vasco, qui impartirá o día 8 a ponencia “Prochectos de regadíos sostenibles ta Binefar”; u Carlos Taibo, profesor de Sciencia Politica y de l’Administración d’a Universidat Autonoma de Madrit, qui explicará qué ye o decrecimiento economico.

Amás, diversos colectivos como lo Ret de Simients d’Aragón, Oil Crash Observatory, Som Energia u Agricultura Rechenerativa Iberica, entre atros, participarán con diversas charradas divulgativas.

D’atra man, mientras tot o cabo de semana se podrá desfrutar d’una caravana ecolochica a cargo de L’art du soleil, y o domingo, entre atras actividatz, se celebrará un mercau de proximidat.