Ganadería|Ganadería Extensiva|Sin categorizar

Ista semana se presentó o cartel d’a 29ª edición d’a Feria Expoforga, y un anyo mas torna a estar polidismo, consolidando-se asinas no solament como a feria agroganadera mas activa en retz socials, sino tamién a que tiene os cartels mas atractivos, como se puede comprobar fendo una golladeta a os cartels d’as zagueras edicions.

O cartel d’ista edición ha estau disenyau por David Rovira, de Rc Estudio, y María Brun, tecnico responsable d’a Feria. En o cartel, cargau de simbolismo, amaneixe a carrasca de Miramón, en l’Alta Zaragoza, un cautivo tradicional de secano y a ganadería autoctona d’a comarca. Se mira de reflexar, seguntes indicó María Brun, que “con treballo s’aconsigue recuperar cautivos y especies ganaderas quasi perdidas”. O cartel ye un homenache a o treballo de mantenimiento de l’agricultura y ganadería de montanya.

Tamién se dioron a conoixer as Chornadas Tecnicas previas a la Feria. A presidenta d’a Comarca d’a Jacetania, Montse Castán, destacó totz dos temas que s’han esleiu t’as Chornadas Tecnicas por parte d’a Comisión de Medio Ambient y Feria d’a Comarca, como son o cooperativismo, que s’analisará o día 11 de mayo, y a despoblación, que será obchecto d’analís y debat o día 2 de chunio, a vispra d’a obridura d’o recinto ferial.

Iste anyo se conta de nuevo con a colaboración d’o CITA en a organización d’as Chornadas Tecnicas. Os días 18 y 25 de mayo, a Finca A Garcipollera acullirá dos chornadas. Seguntes explicó o tecnico d’a Finca a Garcipollera, Javier Ferrer, o día 18 Ricardo Revilla charrará sobre “Qué puede aportar a I+D a o mantenimiento d’a ganadería de montanya?” y o día 25 Pilar Errea explicará o programa que se desembolica en a Finca de recuperación pa meter en valor os frutals locals en zonas de montanya. Todas dos chornadas contarán con una visita tecnica a la finca.

Previo a la Feria Expoforga se realizará tamién a Semana Agraria d’a Jacetania, organizada por o Sindicato UAGA. Ye a quatrena edición d’ista actividat, que tendrá puesto os días 29, 30 y 31 de mayo y 1 de chunio en diferents localidatz d’a comarca, an se tractarán temas d’actualidat t’o sector.

María Brun destacó que dende fa uns anyos a organización d’a Feria “veyó a importancia d’as chornadas tecnicas y cada anyo se buscan temas d’importancia t’o sector primario y t’o mundo rural. Temas que aporten ideyas y solucions ta amillorar y rentabilizar as explotacions agroganaderas y forestals y conoixencia y mesa en valor de nuevas iniciativas ta animar l’emprendimiento, tot ixo con a finalidat d’asentar población en as chicotas localidatz d’a nuestra comarca, chenerar puestos de treballo y seguir mantenendo as explotacions tradicionals”.

Chornadas Tecnicas Os Chueves d’Expoforga 2017

11 de Mayo: Cooperativismo, Economía Social Sostenible. Puent d’a Reina de Chaca. De 9:30h a 14:30h. Se charrará de cómo encetar una cooperativa, os suyas tramites, avantallas y inconvenients. Emprender con conviccions. Y se conoixerán experiencias de cooperativas agroalimentarias, medioambientals, artesanas u de consumo, ta finalizar con un foro de debat. Bi participarán representants d’a Cooperativa Alimenta Perineus, Conatur, Lupierra u o colectivo Sieso, entre atros.
Organiza: Usina de Desembolique y Departamento de Choventut d’a Comarca d’a Jacetania.

18 de Mayo: Qué puede aportar a I+D a o mantenimiento d’a ganaderia de montanya?. Finca A Garcipollera. Debat-mesa redonda, amoderada por Ricardo Revilla. Visita tecnica a la finca.
Organiza: CITA-Finca a Garcipollera

25 de Mayo: Recuperación y mesa en valor d’os frutals locals en zonas de montanya. Finca A Garcipollera.
Bi intervendrá Pilar Errea. Visita tecnica a la finca.
Organiza: CITA- Finca a Garcipollera.

2 de Chunio: Despoblación versus Repoblación. Puent d’a Reina de Chaca
Se i conoixerán prochectos y experiencias aragonesas relevants sobre despoblación, entre ellas o Estudeo que son realizando en Artieda.
Organiza: Usina de Desembolique y Departamento de Choventut d’a Comarca d’a Jacetania.

Ta participar en as Chornadas Tecnicas ye necesario realizar una inscripción previa, gratuita, en a Comarca d’a Jacetania.

Milars de ganaders espanyols son tenendo grans dificultatz con a suya declaración d’a PAC 2015, en trobar-se con que as autoridatz han reduciu -u anulau completament- a eslibilidaT d’os pastos que vienen fendo servir dende fa anyos.

Ista decisión unilateral tiene o suyo orichen en as inspeccions d’a Comisión Europea, que dende fa quantos anyos viene exichindo a las autoridatz espanyolas que reduzcan os pagos directos d’o primer pilar d’a PAC a aquells pastos con mayor presencia d’arbols y arbustos. Ta fer frent a las sancions imposadas por a Comisión, Espanya ye restrinchindo drasticament a esleibilidat d’os pastos lenyosos por meyo de dos mecanismos que se basan en a vechetación d’as parcelas de pastos:

• Reclasificación de muitos Pastos Arbolaus como Superficies Forestals en o SIGPAC, con o que istes pastos pierden completament a suya esleibilidat.
• Aplicación d’un nuevo “Coeficient d’Admisibilidat” a la resta d’os pastos, que penaliza qualsiquier superficie amplia con bella densidat y altura de vechetación lenyosa.

O gran defecto de totz dos procesos ye que no se ye tenendo en cuenta si la parcela tien uso u no, ya que se basan solament en obserbacions d’a vechetación por teledetección.

Ista situación puede afectar a o 86% d’as quasi 19 millons d’hectarias consideradas como pastos por o SIGPAC en 2013, d’as qualas 5 millons correspondeban a Pastos Arbolaus y mas d’11 millons a Pastos Arbustivos, mayoritarios en todas as Comunidatz Autonomas.

O  Informe sobre a elegibilidad ta pagos directos d’a PAC d’os pastos leñosos espanyols, elaborau por ista Plataforma en colaboración con o Foro Europeu t’a Conservación d’a Naturaleza y o Pastoralismo (EFNCP), cuestiona a fundamentación tecnica y scientifica d’istas decisions. Amás, revela que a exclusión de pastos lenyosos no s’achusta a las nuevas normativas europeas, qualas definicions admiten que os elementos lenyosos pueden predominar en os pastos, y solament excluyen clarament d’os pagos a os pastos que no s’utilicen por o bestiar.

Seguntes Guy Beaufoy, Responsable de l’Aria de Politica Agraria d’o EFNCP, “os nuevos reglamentos europeus no arroxan dubdas a o respecto: toda a vechetación (herbacea u lenyosa) que sía pastable y accesible a o bestiar ye plenament elechible ta las aduyas d’a PAC. Manimenos, as autoridatz espanyolas son acceptando a  presión d’os auditores europeus y excluindo muitos pastos, sin comprobar si son superficies que gosan d’estar utilizadas por o bestiar. Si en son, habrían de seguir recibindo aduyas directas d’a PAC“.

A partir d’un detallau analís de cinco tipos de pastos arbolaus y ueito pastos arbustivos caracteristicos d’a Espanya peninsular, asinas como d’un capitol especifico t’as formacions adehesadas, l’informe contrimuestra que a presencia d’arbols y arbustos no tiene por qué aminorar a capacidat forrachera d’as parcelas de pastos ni indica una situación d’abandono.

Asinasmesmo, l’informe aporta argumentos y solucions practicas y viables ta que aquells pastos arbolaus y arbustivos d’o nuestro país que sían estando pastoreados por ganaderías extensivas continen estando admisibles ta las aduyas directas d’a PAC. Entre atras opciones, s’aboga por que se revisen os coeficientes d’admisibilidat de pastos, sobre a base de l’intrés forrachero d’os pastos lenyosos y a la capacidat d’as nuestras razas ganaderas ta aprofitar-los. Asinasmesmo, s’anima a las Comunidatz Autonomas a emplegar a formula d’as Practicas Locals Establidas (aplicable tanto a os usos tradicionals como a las necesidatz de conservación d’habitats protechius) ta tornar a dotar d’esleibilidat a os pastos consideraus “excesivament lenyosos”.

A Plataforma por a Ganadería Extensiva y o Pastoralismo acaza un tractamiento chusto en a PAC ta totz os pastos efectivament utilizaus por o bestiar, por o qual ye desembolicando una campanya de difusión d’iste informe, y denunciando a discriminación inchustificada que son sufrindo muitas d’as explotacions ganaderas mas sostenibles d’o nuestro país.

Como parte d’ista campanya, a Plataforma ha ninviau una carta sinyada por 60 organizacions a o Director Cheneral d’Agricultura d’a Comisión Europea, Jerzy Bogdan Plewa, con a finalidat de dar a conoixer a problematica que son causando os suyos auditors. Asinasmesmo, se ye contactando mientras istes días con as Consellerías d’Agricultura y Meyo Ambient d’os distintos gubiernos autonomicos, en mans d’os quals se troban as decisions finals sobre cómo tractar os pastos lenyosos en a nueva PAC, ta que puedan conoixer l’informe y ofrindo colaboración ta correchir, en a medida d’o posible, ista situación.