Medio rural

Ya ye primavera. A lo menos, ya lo ye oficialment. Cada anyo l’hibierno dura menos, as nevadas tardan mas en plegar y as flors colorian dinantes os paisaches.

A nuestra memoria, como l’hibierno, tamién ye cada vegada mas curta. Acaso belún recuerda ya que ista Navidat, en plena temporada, as pistas habioron de zarrar porque no bi heba nieu? Belún recuerda que ista luita ya la viviemos fa quasi vente anyos quan mirabanos de protecher A Espelunciecha? No lo se, cuento que ya dengún no lo recuerda. A nieu cayió sobre as memorias y las borró, igual como borra os sinyals anonimos d’ixos sers silenciosos que dan vida a las fumeyants chamineras en os nuestros lugars.

O Gubierno d’Aragón no lo recuerda. U talment sí, como un suenio -malsuenio- leixano d’o qual no quiere fer-se alcordanza. Una mentira, como la d’o cambio climatico y la de querer revertir a despoblación y diversificar l’actividat economica.

Igual que nos xublidamos d’os nuestros dioses ancestrals, ixos que un día se convirtioron en penya y facioron d’ista una tierra de leyenda a traviés d’unas parolas en una luenga que s’amorta igual como se’n fue lo bucardo, y que nomás vuelan ya a traviés d’as alas de bell cluxiuesos.

Podremos ixuplidar bell día que bi habió un tiempo en o qual acariciabanos a tierra d’a Canal Roya y desfrutabanos de toda la suya biodiversidat sin pilonas, ni cables, ni telesiellas? No, no lo creigo.

Iste año o Gubierno d’Aragón ha resucitau una pantasma que leva anyos sobrevolando as casas nuestras, menazando os nuestros ecosistemas y metendo en risgo a flora, a fauna y a cultura local. Me refiero a lo prochecto d’unión d’as estacions d’esquí d’Astún y Formigal a traviés d’a Val d’a Canal Roya. Os defensors d’ista iniciativa argumentan que a unión d’istas dos estacions creyará una d’as zonas d’esquí mas grans d’Espanya y atrayerá a mas turistas, lo que chenerará mas emplego y beneficios economicos pa la rechión. Manimenos, una parte important d’a población local insiste en sinyalar que iste prochecto puede tener grieus conseqüencias medioambientals, asinas como un impacto negativo en a vida d’os habitants d’os lugars cercanos.

Podríanos charrar d’os atascos que se repiten cada cabo de semana, d’una zona saturada de turismo, d’a dificultat d’acceso a la vivienda d’a chent d’a zona por os altos pres d’as segundas residencias, de l’emplego precario y solo por uns pocos meses a l’anyo, d’o prochecto de construyir dos Burger Kings en a zona (un en Chaca y unatro en Samianigo)… U d’una val con una gran biodiversidat, con un paisache unico que puede chenerar emplego de calidat y bien remunerau en o sector turistico de naturaleza, d’a espectacular gastronomía local —que luita per sobrevivir debant d’a creixent demanda de salchichas de cochín tipo Frankfurt que tant poco tienen d’o territorio y que invaden as cafeterías d’as pistas—, d’os cuentos, d’as broixas d’a Val de Tena, d’as leyendas, de cómo o Dios Anayet y a Diosa Arafita cosiran d’a Foratata: ixa penya en a quala se convirtió a suya filla, Culibilla, en negar o suyo amor a lo omnipotent dios Balaitús, y de cómo as fornigas d’O Formigal —ixe puesto que hue da nombre a la mayor estación d’esquí d’Aragón— la protechioron, y de cómo Culibilla, en agradeiximiento, se foradó o suyo corazón pa acullir en ell pa siempre a las fornigas blancas, y d’astí o suyo nombre en ista luenga medieval: Foratata.

U tamién de cómo, dillá d’os curtos hibiernos y a insostenibilidat —cada vegada mas evident— d’as pistas d’esquí, o cambio climatico ye plegando en un punto —debiu a la actividat humana— en o qual cada vegada resulta menos viable a vida en a planeta en un futuro proximo, tal como resalta en o suyo zaguer informe o Panel Intergubernamental sobre o Cambio Climatico (IPCC).

Por ixo, talment, cada vegada resulte mas complicau comprar l’argumento de que o esquí va a chenerar emplego de calidat en as comarcas pirenaicas, quan, en o contexto actual d’emerchencia climatica en o qual nos trobamos, habríanos d’estar conscients d’a falta de nieu y d’augua y fer-nos-ne por abanzar-nos a las sequeras que cada anyo van a estar mas severas, a lo risgo d’incendios cada vegada mayor. Y en cuenta d’invertir en prochectos completament insostenibles dende qualsequier punto de vista —y especialment dende a perspectiva climatica y ambiental—, como o esquí u as macroexplotacions de ganadería industrial, habríanos d’achugar por iniciativas que metan en o centro a chestión eficaz y chusta d’o territorio. Isto ye, emparar a las chicotas ganaderías extensivas familiars que encara sobreviven en istas comarcas, empentar a creyación de nuevos rabanyos que aduyen a conservar istos paisaches y a aprevenir futuros incendios. Afavorir a diversificación de l’actividat economica y emparar o turismo basau en a obserbación y desfrute d’a naturaleza d’una forma responsable. Y estar conscients, tamién, que no se puede promover garra pista d’esquí sin tener asegurau que va a haber ganau pastando en as estacions en verano, ya que, si no estase por l’acción d’o pastoreo que talla a hierba y mantiene a vechetación en equilibrio, a hierba creixería y se formarían bolsas d’aire entre la vechetación en cayer a nieu que dificultarían enormement a practica d’o esquí, por no charrar d’a matorralización d’o paisache.

Cómo imos a decir-les a os ninos y ninas y a las personas chovens, que tiengan suenios, que s’esforcen en estar libres, quan les somos rancando os zaguers recursos que encara conservamos, quan se ye fendo caso omiso d’os informes scientificos, quan se ye negando o impacto ambiental evident d’iste tipo de prochectos, quan en cuenta de conservar os ecosistemas, los somos destruyindo?

Dende aquí pido perdón a las cheneracions venideras. Nusotros no querebanos a destrucción d’a Canal Roya, ni tantas atras cosas…

Articlo publicau en a sección La Braña d’El diario.es Cantabria o 18 de febrero de 2016.

A l’atra semana me comentaba un amigo ganadero que a suya vida yera muito mas comoda dende que se lanzó a fer compras por internet. De rapiconté, no solament no ha de pillar l’auto ta desplazar-se t’a ciudat y padeixer o estrés d’os irs y venirs d’a chent movendo-se-ne en totz os sentius dentro d’un centro comercial, sino que, amás, recibe o pediu a l’atro’l día, y, por si estase poco, puede tornar-lo si no le satisfa.

Pareixe que a machia d’internet ha plegau, tamién, en o medio rural. O problema ye que en os lugars a velocidat de connexión ye mas lenta, tanto en os fogars como en o ret mobil, y o recientment plegau 4G no existe en nuclios de población de menos de 70.000 habitants. En realidat, en muitos municipios solament i hai connexión 2G y en beluns no bi ha que G. De feito, en o V Foro de Desembolique Rural, celebrau ista semana en Zaragoza en o marco d’a Feria Internacional de Maquinaria Agricola (FIMA), y quala tematica chiraba arredol de cómo encarar os retos d’os chovens agricultors, s’ha constatau que un d’os prencipals problemas de l’agricultura chunto con o dificil acceso a la tierra, l’enviellecimiento u a invisibilidat d’a muller, ye a falta d’una buena connexión d’internet.

Manimenos, a penar d’a mala connexión y d’a falta de politicas orientadas a revertir ista situación, internet podría convertir-se en una pieza fundamental t’aturar a despoblación y mesmo empentar l’asentamiento de nuevos habitants en os nuestros lugars. Y ye que internet permite meter en contacto a personas de totz os costaus, sin importar o puesto en o qual se troban, facilitando que personas radicadas en ciudatz, den o blinco a o medio rural en poder realizar dende astí o suyo treballo. Amás, as nuevas tecnolochías permiten a las personas ya asentadas en os lugars fer plegar o suyo treballo a muita mas chent.

Ye o caso d’EcoValdeolea, una ganadería ecolochica familiar en San Martín del Hoyo, a o sud de Cantabria, quala titular, Conchi Gutiérrez, se trobó con o dilema que no sabeba cómo vender a suya carne dende o chicot lugar an vive y que se niega a abandonar, asinas que se lanzó a creyar un blog y agora vende o suyo producto por internet, con tanto exito que tiene lista d’aspera.

Unatro eixemplo ye Huerta Tarruco, un hortal ecolochico que fa servir os retz socials ta recibir os pedius d’os suyos consumidors, a qui les levan as suyas cestas un día por semana, de l’hortal t’a mesa suya sin necesidat d’intermediarios. Encara que internet no solament s’ha tornau una ferramienta fundamental ta agricultors y ganaders, sino que tamién permite organizar actividatz de turismo ornitolochico destinadas a o publico extranchero, dar a conoixer os lamíns d’o tuyo lugar ta que a chent s’anime a ir a probar-los y, en definitiva,empentar o tuyo negocio sía quál sía l’actividat a la quala t’adediques.

Sin dubda, os blogs y os retz socials s’han tornau fundamentals en o desembolique de qualsiquier interpresa, tamién en o meyo rural, pero con tot y con ixo i hai qui se siente incapaz de chestionar-las. Ta ells i hai blogs disposaus a crebar a breca dichital, como La Huerta Digital, un espacio de difusión, comunicación y debat sobre nuevas tecnolochías en l’agricultura y l’agroalimentación.

Queda muito por fer dica que o medio rural aconsiga comunicacions de calidat similar a las ciudatz. Manimenos, ya dengún no puede dicir que ixo d’internet ye cosa d’urbanitas.

Remero que quan cursaba en a facultat l’asignatura optativa Patolochía d’a nutrición de grans animals y de grancha, o profesor nos contó en una d’as clases que en as explotacions d’ovino en as qualas treballaban mullers, l’indice de mortalidat d’os corderos yera muito menor, ya que yeran mas pendients d’encalostrar-los, dar-les o biberón quan a mai no los amamantaba, y deseparar-los malas que i heba bell caso de diarreras. “Talment siga por l’instinto maternal”, nos diciba, u talment, simplament, que se toman mas en serio o suyo treballo.

O caso ye que a muller ha estau siempre a gran ixuplidada, en o medio rural y difuera d’ell. Siempre dezaga d’os hombres, y siempre con todas as fayenas dencima. Quan facié o estudeo sobre Etnoveterinaria d’a Vall de Tena y Tierra de Biescas, a mayoría d’as mullers mayors a las qualas entrevisté, deixaban que estasen os hombres qui charrasen, y, si a un caso, si veyeban que ells no yeran dicindo bella cosa que ellas sabeban, se les eslampaba d’a boca bella parola. Quan contino les preguntaba mirando-las a ellas y exclusivament asperaba a suya respuesta, niervudas, me diciban, “que te’n diga ell, que’n sabe mas, que ha estau siempre en o campo”. Manimenos, son as mullers as que nos han transmitiu o patrimonio cultural y gracias a qui s’ha conservau.

Tot y que siempre sían ells qui den a cara, en qui pensamos quan charramos de ganadería y agricultura, os que salen en os reportaches y en as entrevistas, y, muit a ormino, os que tienen a lo suyo nombre a explotación agraria; son as mullers as que s’han feito cargo d’a casa y as que han criau a os fillos. As que saliban a levar a chenta, se feban cargo de l’hortal, d’os animals que i heba en casa, as que, amás, treballaban en o campo siempre que i caleba. Ye mas, i hai qui ta recolectar bellas fruitas no contracta que mullers, por estar mas cudiadosas. Lo mesmo pasa en bellas ganaderías, an que no se fían que de mullers ta muyir a las suyas vacas.

Son as mullers qui fixan población en o medio rural y le dan continación. En definitiva, as que dan vida a un entorno ixuplidau y moribundo.

Gracias, mullers rurals. Totz os días habrían d’estar o vuestro día.

Articlo publicau orichinalment en Arainfo o día 10 d’octubre de 2015.

Quan viviba en Cochabamba (Bolivia), una vez estié con uns amigos en un supermercau d’a zona norte d’a ciudat. Yera un supermercau endrezau t’a clase alta, a o estilo d’os hipermercaus europeus. Fendo una gambada por os corredors, m’aturé mientras un rato largo en o d’os lamins. I heba nutella, tabletas de chicolate… y atras delicias que feba tiempo que no veyeba. A que mas me trucó lo ficacio, estió a leit condensada, y no porque trobase a faltar a suya sabor, sino porque yera increyiblement barata. Lo mas curioso ye que yera holandesa. Cómo podeba costar 1€ una lata de leit condensada importada d’os Países Baixos? Reconoixco que me fació escaldafríos y por a mía ment se redamoron os litros y litros de leit que Nestlè, y atras multinacionals, vendioron en forma de leit en polvo a países latinoamericans y africans dimpués de l’accident nuclear de Chernobyl en estar viedau o consumo d’iste producto contaminau en Europa.

Manimenos, a leit condensada que yo tenié entre as mías mans no yera prohibida en Europa, simplament, yera altament subvencionada por a Unión Europea gracias a la Politica Agraria Comuna (PAC) y por ixo teneba un pre de venda tant baixo. Pero ta entender isto, primero, cal conoixer un poquet mas sobre a mas famosa de todas as politicas europeas. Resulta que a PAC naixió en o sino d’una Europa de postguerra, en a quala, a producción agropecuaria se i heba visto disminuida y l’abastecimiento d’alimentos yera en periglo, en uns anyos de grans migracions d’o campo t’a ciudat. Con iste panorama, no i habió mas remedio que desembolicar medidas que favoreixesen a producción agricola, guarenciando un suministro estable a os consumidors, ta ixo, caleba tamién asegurar uns pres elevaus a os agricultors. As medidas estioron tant eficaces, que a UE no solament aconsiguió a suya autosuficiencia alimentaria, sino que, en os anyos 80, o problema pasó a estar a sobreproducción y a solución remató estando exportar l’exceso de productos d’orichen agroganadero a tercers países.

En iste punto ye an se crucea a historia d’a PAC con a d’a mía leit condensada, y an prencipian os problemas y una historia muit turbulenta. Resulta que a la UE no le fa goyo tirar a birolla, pero tamién da la casualidat que os países en vías de desembolique producen alimentos muito mas baratos que no los europeus, asinas que si Europa no quiere tirar cantidatz inchents de birolla tiene dos opcions: producir menos u vender-las a un pre muit inferior a o de producción a tercers países, y Europa opta por a segunda. Ista decisión provoca en os países receptors una disminución d’a producción local (porque os agricultors no pueden competir con os pres tiraus d’os productos subvencionados europeus) y, de vez, grans desplazamientos de labradors ent’as ciudatz.

Ta guarenciar a producción local, qualques países optoron por protecher a os suyos agricultors metendo arancels a la importación de productos europeus, pero Europa respondió menazando a aquells países que tractasen d’impedir as importacions europeas con perder os prestamos y as aduyas en materia de cooperación que les da a Unión Europa, obligando-les d’ista traza a comprar alimentos europeus y perdendo a suya autosuficiencia.

Puede resultar curioso que, manimenos a sobreproducción, a UE siga subvencionando os productos agricolas ta competir con países an que os costes son mas baixos, y, con tot y con ixo, no protecha d’a mesma traza a atros sectors que desplazan as suyas industrias a tercers países ta abaratar os costes de producción. O que pasa ye que o sector primario ye primario por bella cosa, quiero dicir, que plegau un momento d’escasez u de guerra, en o qual os países zarrasen buegas, podríanos sobrevivir sin una ripa de cosas, pero no podríanos sobrevivir sin birolla. Diz a frase popular “piensa malament y encertarás” y, si pensamos malament, resulta que a UE ye aconseguindo que muitos países sían dependients d’ella en materia agroalimentaria. Resulta que os efectos de que un país zarre buegas a la venda de productos europeus (como pasó l’anyo pasau con o veto ruso) implica t’a UE tener una gran cantidat de producto por o qual ha pagau grans cantidatz ta producir-lo y a o que no puede dar salida. Manimenos, d’o revés, as conseqüencias son muito mas nefastas. Si a UE zarrase de bote y boleyo a venda de productos agricolas a un país a o que ha obligau a estar dependient d’ella, se veyería afectau por a fambre, dau que a mayoría d’os suyos productors han abandonau as labors agricolas y habrían d’empecipiar de zero en a producción, o qual levaría un tiempo dica l’autosuficiencia y no podrían guarenciar l’abastecimiento d’alimentos a toda la suya población.

En Bolivia, o sector lacteo local se mira d’asomar a cabeza en un país en o qual no i hai tradición de consumir iste producto y an que Perú y Europa intentan imposar-se. Ta rebelar-me contra a leit condensada europea, decidié pasar-me a o mate de coca, de producción y tradición local y emparar a os ganaders y agricultors bolivianos que luitan por vivir d’a suya tierra. Pero i hai países en situacions muito piors que Bolivia, an que os suyos labradors son cansos de luitar, y han abandonau a ixada por o fumo d’as grans ciudatz. Países condenaus a depender d’Europa, dica que en Europa digamos ‘prou’.

De totz os movimientos especulativos que se mueven a o nuestro arredol, probablement o mas cruel sía o de l’alimentación. No sabemos brenca d’os alimentos que consumimos, y no sabemos brenca d’os alimentos que subvencionamos, porque a PAC, que suposa un 40% d’o presupuesto d’a UE, la pagamos totz.

Hue se conmemora o Día Internacional d’a Choventut y a organización choven d’a Unión de Chicotz Agricultors y Ganaders, UPA Choven, quiere recordar as estorbaduras que os chovens sufren a la hora de treballar y vivir en o medio rural. “L’alto aviellamiento de l’agricultura y a ganadería, sectors estratechicos, ye un periglo t’o futuro economico d’Espanya”, advierten dende UPA. Ta revertir ista situación a organización ha elaborau un decalogo de medidas.

L’alarmant aviellamiento d’a población activa d’o campo ye un d’os problemas estructurals de l’agricultura y a ganadería espanyolas. “Se tracta d’un problema vital”, advierten dende UPA Choven, “no solament porque condiciona a eficacia economica d’as explotacions, a suya capacidat d’innovar, competir y adaptar, sino tamién porque determina o relevo cheneracional y o futuro d’istes dos sectors estratechicos ta qualsiquier país”.

L’actividat agraria ye un treballo practicament viedau a os chovens en Espanya. “Ye quasi imposible que un choven se convierta en ganadero u agricultor si no viene d’una familia con a explotación ya establida”, explican en UPA Choven. Mesmo ta aquells con familias que treballan o campo existen muitas estorbaduras que impiden que sigan con o negocio familiar y abandonen o campo. As mas problematicas son l’alto pre d’a tierra, a richidez d’o mercau, a escasez d’arrendamientos y l’enorme capital necesario ta emprender istas actividatz.

Amás d’istas barreras, os chovens tienen atras que afectan a toda a comunidat, como son l’acceso a servicios, infrastructuras y dreitos. Son basicos t’os ciudadans d’as urbes, pero l’acceso ye cada vez mas complicau t’a chent d’o medio rural. UPA sinyala que os eixemplos mas alarmants son “a merma d’instalacions sanitarias y educativas, a deficient ofierta de meyos de transporte y o menor acceso a las comunicacions”.

Manimenos, istas causas son  “reversibles si as autoridatz se meten ya mans a la obra”. Ta remediar istes problemas y fortalecer a la choventut d’o rural, UPA Choven proposa o siguient decalogo de medidas:

1. Emparo mas contundent a la encorporación d’os chovens. Una politica activa d’emparo a la encorporación ha d’enmarcarse en distintos aspectos como las aduyas dreitas, prestamos a baixo intrés, exenciones d’imposaus de transmisión y sucesión, flexibilidat d’avales, etc.
2. Plan d’acceso de tierra ta chovens. Dau l’encarecimientos especulativo d’o mercau d’a tierra, cal y urchent elaborar medidas dirichidas a favoreixer a ofierta y arrendamiento de tierras, asinas como a venda d’as mesmas.
3. Mayor facilidat en a transmisión d’explotacions. Se debe facilitar a transmisión d’explotacions, especialment en os casos de cese abanzau de l’actividat agraria, eliminando obstaculos de tipo restrictivo que impidan u dificulten l’acceso a la titularidat d’as explotacions.
4. Creyación d’organismos de transmisión de tierras. No se puede concebir un programa de chubilación anticipada sin a constitución d’organismos de transmisión de tierras que actúen fendose cargo d’as tierras en arrendamiento u transmitidas en propiedat, con l’obchecto de transmitir-las posteriorment seguntes as siguients prioridatz: agricultors chovens, ampliación de superficie en chicotas explotacions y conservación d’o medio rural.
5. Exención d’os gastos de transmisión de tierras a las chicotas explotacions (gastos de notaría, rechistro de propiedat, impuesto de transmisions, etc.). Asinasmesmo, s’han de facilitar aduyas en forma de subvencions y/u creditos t’os chicotz y medianos agricultors que compren tierras a os agricultors que s’aculgan a o programa y puedan asinas aumentar a dimensión d’as suyas explotacions.
6. Amillora de l’entorno rural. No podemos consentir a existencia de ciudadans de primera y ciudadans de segunda. As personas que habitan o rural espanyol han de tener os mesmos dreitos, servicios y oportunidatz que aquells que viven en as ciudatz. Por tanto, ye necesario amillorar as infrastructuras y os servicios en o campo ta que os suyos habitants tiengan un acceso real a la sanidat, a la educación.
7. Facilitar l’acceso a la chubilación anticipada. Un programa de chubilación anticipada debe estar facilment accesible, tanto t’os agricultors que deseyan cesar en a suya actividat, como ta aquells a el qual se traspasan as tierras.
8. Desembolicar politicas que fomenten l’uso d’as nuevas tecnolochías d’a información y a comunicación dentro d’o medio rural. Isto no solament ta modernizar a nuestra producción, tamién ta romper a brecha dichital que se produz entre a ciudat y os lugars y que asinas os habitants de totz dos tiengan o mesmo acceso a la libertat d’información y d’expresión.
9. Prioridat ent’os agricultors chovens. Culaquier medida que pretenda establir diferencias u criterios de prioridat entre explotacions agrarias ha de tener como elemento diferenciador, dende un punto de vista positivo, a las explotacions que os suyos titulars sían agricultors chovens.
10. Enfortimiento d’os programas formativos y de l’asociacionismo chuvenil. Tanto a formación d’os agricultors y ganaders chovens como constituye una d’as bazas fundamentals ta aconseguir una agricultura moderna y competitiva. Por ixo, cal que l’Administración empare con mas decisión os programas de formación que realizan as organizacions agrarias.

[Nota de prensa d’a Unión de Chicotz Agricultors y Ganaders]

Mientras toda a semana, os meyos de comunicación s’han feito eco d’o referendum que va a tener puesto hue en Grecia, en o qual, os ciudadans helenos deciden u no acceptar as demandas d’os acreedors internacionals a cambeo de diners ta privar que Grecia no pague as suyas deudas. Muito s’ha debatiu sobre os posibles efectos d’o “Sí” y encara mas sobre os d’o “No”, de cómo afectaría a o turismo, a la sanidat, a o día a día d’os griegos…

Manimenos, a la hora d’informar sobre as conseqüencias que la una y l’atra respuesta tendrían sobre l’agricultura, a ganadería, a pesca y, en definitiva, sobre l’alimentación, a información que se troba en o ret en castellán y en anglés ye nula. Ye curioso que dengún no charre d’un sector que, seguntes datos de l’Ambaixada griega, emplega a una quatrena parte d’o país, y que chuga un papel mas que important dentro d’a Unión Europea.

Entre os zaguers anyos, o creiximiento d’a productividat en Grecia ha estau muit por baixo d’a meya d’a Eurozona, l’ature ha remaniu alto y a competitividat d’a economía s’ha debilitau. Por lo que fa a o sector de l’agricultura, a crisi economica desencadenó una caita en os ingresos d’os agricultors d’o 13,5%, una puyada en os costes de producción, especialment en ganadería, y una fuerte disminución de l’emplego en l’agricultura. Encara que o creiximiento de l’ature en a industria y en o sector servicios pareixe haber teniu efectos secundarios positivos en o sector agricola, ya que ha obligau a muita chent a tornar a zonas rurals y agrarias. Resulta interesant, que dica finals de chinero de 2012, d’as 3,092 solicitutz de terrenos que se tramitoron, un 35 % proveniban de personas desemplegadas que quereban cautivar a tierra, mientres que solament un 8 % concerniban a agricultors en activo. Amás, ha aumentau a venda de productos en circuitos cortos de comercialización, encetando un camín ta l’autoabastecimiento.

Manimenos os efectos d’a crisi en o sector agrario, l’agricultura y a ganadería continan chugando un papel fundamental en o comercio exterior griego. Muitos países d’a UE satisfan as suyas necesidatz con productos d’orichen griego (aceite d’oliva, fruitas y hortalicias, cereals…). D’atra man, encara que Grecia cubre en gran parte as suyas necesidatz agricolas, importa productos carnicos, lacteos y piensos d’atros países. Por o que o ‘No’, podría romper ista estabilidat, podendo salir afectaus atros países miembros que se quedarían sin cubrir as suyas necesidatz de bells productos y sin trobar salida a la exportación d’atros bienes.

O que tampoco no contan os meyos foranos, pero sí os griegos, son as condicions d’os prestamistas que afectan a o sector de l’agricultura, y que incluyen un aumento d’a taxa d’imposaus d’o 13% a o 26%, aumentar l’imposau anticipau de 27.5% a 100%, retirar a regulación recientment aprebada por o Parlamento griego t’a exención d’imposaus de l’aduya por valor de 12.000 € y os imposaus y os daños agricolas de l’ELGA, retirar o reembolso por l’imposau especial sobre o gasóleo t’os agricultors, aumento en o pre d’a enerchía agricola, grans aumentos en contribucions a OGA, aumento de l’IVA a insumos agricolas dica o 23% (yera en o 13%), aumento de l’IVA a l’envasau de productos agricolas a o 23%. Seguntes aseguró Dimitris Kodela, ministro d’Agricultura griego, “l’acceptación d’istas propuestas va a chenerar una crisi alimentaria y va a estricallar a agricultors y ganaders”.

Fa pocos días, a ministra d’Agricultura, Alimentación y Meyo Ambient d’o Gubierno d’Espanya, Isabel García Tejerina, fació un comentario en Antena 3 sobre o referendum griego que ha suscitau muita polemica. “Paratz cuenta, que as urnias son periglosas”, diciba a ministra, y, en iste caso, pueden estar-lo, y muito, pero más que más t’o suyo ministerio, ya que os prencipals cautivos producius en Grecia son o tabaco, o trigo, os tomates, os citricos, a remolacha zucrera, os vinyeus, as oliveras, as trunfas, y o cotón. Ye curioso, porque si buscamos quáls son os prencipals cautivos en Espanya nos trobamos con que son a olivera, l’hordio, o trigo, a remolacha zucrera, o panizo, as trunfas, o centeno, a cibada, l’arroz, os tomates, a cebolla, os vinyeus, os citricos… cobrando especial importancia o tabaco en qualques rechions como Extremadura. Amás, tanto en Grecia como en Espanya, ye especialment significativa a cabana ovina… Vaiga, qué casualidat! Qué pasaría si gana hue o ‘No’? Se teme una caita d’os pres que meta en periglo a producción intensiva espanyola y as suyas exportacions?

Lo cierto ye que dengún no sabe qué pasará manyana, y probablement dengúnno i haiga encertau con as suyas especulacions. O que sí se conoixe, ye que l’autoabastecimiento perchudica a os importadors, pero no afecta ni a os consumidors d’a piet, ni a os productors que tienen asegurada a venda d’o suyo producto. Hue i hai muitas mas cosetas en chugo que no as que nos contan, y o sector de l’Agricultura ye una d’ellas.

Talment habríanos d’aprender a producir de forma sostenible, solament as cantidatz necesarias, con insumos propios, ta que o bater d’as alas d’una mariposa en unatro punto d’a planeta, no meta en periglo a la nuestra economía.