Sin categoría

O proximo Seminario d’o Ret FAO-CIHEAM d’Ovinos y Caprinos tendrá puesto en Vitoria-Gasteiz d’o 3 a o 5 d’octubre de 2017, y tractará sobre “Innovación pa la sostenibilidad en ovinos y o caprinos“. O Seminario, que reunirá a os Subretz de Nutrición y de Sistemas de Producción, ye organizau conchuntament por l’Instituto Basco d’Investigación y Desembolique Tecnolochico NEIKER-Tecnalia, l’Instituto Agronomico Mediterranio de Zaragoza (IAMZ-CIHEAM) y o prochecto H2020 iSAGE (Innovation for Sustainable Sheep and Goat Production in Europe), con a colaboración d’a Organización d’as Nacions Unidas pa l’Alimentación y l’Agricultura (FAO).

O ret inter-rechional FAO/CIHEAM pa Investigación y Desembolique en Ovinos y Caprinos tiene como obchectivo o estudeyo y a millora d’a producción ovina y caprina en a rechión mediterrania. O ret organiza trobadas periodicas d’os suyos dos subretz (Nutrición y Sistemas de Producción). En ista ocasión, o seminario conchunto d’os dos subretz tendrá puesto en a ciudat de Vitoria-Gasteiz, y será ubierto a investigadors, tecnicos, estudiants de postgrau y atros profesionals que treballen en a millora d’o sector d’os chicotz remugants en países d’o Mediterranio y dillá. Os idiomas de treballo d’o seminario serán anglés y castellano, facilitando-se a interpretación simultania pa las presentacions orals.

Os sectors d’ovinos y caprinos se troban debant d’un futuro incierto por a suya falta cheneral de competitividat, habiu en parte a resultaus tecnicos y economicos insuficients pero tamién a serios retos socials y ambientals.

Pa fer frent a ista situación, se requieren solucions innovadoras a distintos libels (animal, rabanyo, censo ganadero, explotación, territorio, cadena de valor, etc.), pa que os sectors d’ovinos y caprinos sían mas sostenibles y rentables debant d’os desafíos emerchents; medioambientals, climaticos, socioeconomicos, demograficos, politicos y comercials. Istas innovacions pueden amillorar tecnicas de producción, organización de man d’obra, instalacions y infrastructuras, y aplicar-se a programas colectivos pa selección u a campanyas sanitarias. Tamién pueden reforzar-se formas socials d’organización tals como programas de calidat de productos u chestión de pastos comunals. As estratechias innovadoras d’alimentación, de conchunta con practicas de ganadería de precisión, pueden reducir carencias en a producción y adaptar-se a os desafíos medioambientals, ofrindo unas solucions prometedoras pa os obchectivos plantiaus.

L’obchectivo d’o seminario ye d’empentar a participación y interacción entre scientificos y tecnicos que treballan en a industria d’ovinos y caprinos con o proposito d’introducir o marco conceptual d’o desembolique y de l’adopción d’a innovación y analisar as innovacions necesarias pa adaptar os sistemas de producción a las nuevas exichencias d’a sociedat. Se presentarán historias d’exito d’innovacions ya adoptadas en a industria d’ovinos y caprinos y s’introducirá o tema d’a ganadería de precisión, no solament como vector d’innovación, sino tamién como una oportunidat pa la sostenibilidat d’o sector.

O programa ye disponible aquí, y pa mas información se recomienda consultar a pachina d’o seminario: http://networks.iamz.ciheam.org/sgvitoria2017/es/

En Aragón, somos vivindo istos zaguers anyos un afortunau desapegue d’a Economía Social y Solidaria (ESS) d’o que una buena preba ye a recient setena edición d’a Feria d’o Mercau Social d’Aragón. Iste desembolique manimenos se ye centrando en a propia ciudat de Zaragoza, conseqüencia d’a singular disposición d’o territorio aragonés con un extenso medio rural de baixa densidat de población que rodeya a gran macrocefalia d’a suya capital.

Van aumentando dingo londango as entidatz que practican a ESS en o medio rural y que treballan en ret compartindo obchectivos y trazas de fer con atras entidatz que forman parte de REAS Aragón u d’o Mercau Social d’Aragón. Pero amás son numerosos os prochectos productivos y economicos, muitos d’ells empentaus por mullers que, en o medio rural aragonés, responden a grans rasgos a os prencipios d’a ESS sin estar conscients d’ixo u sin haber-se uniu encara a iste incipient ret. Y ye gracias a istos prochectos que muitas zonas rurals d’Aragón son dispertando a la esperanza de creyar dende o propio territorio un millor futuro pa os suyos propios lugars, una actividat economica pa o buen vivir de toda a comunidat.

Toda ista situación nos levó a un grupo de personas vinculadas a REAS Aragón, l’agroecolochía u a sobiranía alimentaria, muit ligadas a o medio rural, a prencipiar a trenar una iniciativa d’empente d’a ESS en o medio rural aragonés, que hemos denominau como “RuralESS” y a compartir as nuestras reflexions con atras personas d’o medio rural por medio d’un manifiesto que se puede leyer aquí.

Con a finalidat de seguir creixendo y de seguir fendo ret, convidamos a todas as personas que sían intresadas o proximo 17 d’aviento en Aínsa-Sobrarbe a chuntar-nos, conoixer-nos y compartir os nuestros prochectos y iniciativas de vez que conoixemos o concepto y as valors d’a Economía Social y Solidaria.

A trobada ye gratuita pero ye necesario inscribir-se previament replenando iste formulario.

Programa d’a trobada:

17 d’aviento de 2016
Concello de Aínsa (Plaza Mayor, 1), Sobrarbe, Uesca

10-11 h. Presentación
11-12.30 h. Charrada-Taller: Qué ye a Economía Social y Solidaria?
12.30- 13 h. Pausa
13- 14.30 h. Treballo en grupos
14.30-16 h. Chenta
16- 17 h. Compartindo o café pa conoixer experiencias
17- 18.30 h. Taller: Aterrizando prochectos en a ESS
18.30 h. Conclusions, propuestas de continuidat y zarre d’a trobada

Pa mas información, puetz consultar iste vinclo, ninviar un email a2 administracion.aragon@cerai.org, u trucar a os telefonos 976 59 97 11 | 652 42 21 96

En o programa De Puertas Al Campo, d’Aragón Radio, d’o domingo 20 de noviembre, participó l’autora d’iste blog, Lucía López Marco charrando d’agroturismo y o suyo posible potencial en Aragón, amás de presentar iste cubillar en o ret.

A intervención (en castellano) puede escuitar-se dende o menuto 7 punchando en o siguient enlace: http://www.aragonradio.es/radio?reproducir=149112 🙂

Articlo publicau en a Revista Ronda Somontano o 14 d’octubre de 2016.

Diz que fa milars d’anyos que as chents que viviban en as marguins d’o Río Vero prencipioron a cautivar simients y a criar animals. Abandonoron o suyo nomadismo, dependient d’os ciclos d’a fauna salvachina y a estacionalidat d’as plantas, pa quedar-se aquí. Lo dicen as piedras que conforman as paretz d’as espelungas que, sobrevivindo a o tiempo, nos recontan historias de mullers y hombres que domesticaban remugants y que quedoron immortalizaus pa cutio con uns pigmentos minerals en as profundidatz d’o Somontano.

He de confesar que, encara que siempre he sabiu d’a existencia d’as pinturas rupestres d’o Parque Cultural d’o Río Vero, estió quan descubrié que un d’ixos abrigos plenos de dibuixos se deciba “O tozal de Mallata” y que en ixa Mallata s’heba immortalizau a chent levando con cuerdas a remugants, como imachen d’as primeras domesticacions, quan istas prencipioron a trucar-me l’atención y quan s’afincoron en a mía cabeza.

Diz Wikipedia que “una mallata ye una cabana u un estallo desalpartau d’as zonas pobladas, que sirve pa acubillar a o ganau y a os pastors contra l’orache y en as nueitz que calga que i pasen istes segundos, tot cosirando a os primers”. O feito de que en un puesto clamau asinas se troben refuchiadas as imachens d’as primeras personas que s’adedicoron a la cría de bestiar en a comarca, diz que, encara que haiga pasau milenios, os costumbres d’a zona no han cambiau dica fa poco.

Y ye que, ha estau en as zaguers decadas quan o censo d’ovellas y crabas ha prencipiau a baixar en o Somontano de Balbastro. No ye un feito isolau, o descenso d’a ganadería ye común a toda la Peninsula Iberica, que ye veyendo como los suyos ecosistemas, moldiaus por l’actividat ganadera dende que os nuestros antepasaus neoliticos decidioron d’asentar-se aquí, se van degradando. Cada vez son mas freqüents os incendios, porque bi ha menos animals controlando a vechetación, y tamién bi ha menos chent vivindo en os lugars. Manimenos, veyemos a ormino latas, plasticos, y mas vasuera que no fa parte d’o medio, que lo contamina, que lo degrada y que estricalla a maravilla natural que son o Río Vero y o suyo arredol.

Lo cierto ye que una atura a pensar-ie, y ye, como poco, machico, que ni os desastres naturals, ni, mas que mas, os humans, haigan feito desapareixer a historia pintada d’istas tierras. Diz que cal conservar-las y estudiar-las porque, amás d’historia, son obras d’arte, pero… Y si estasen bella cosa mas? Talment sigan un mensache que as chents d’antesmás nos ninvian pa que no oblidemos que cal respectar y admirar o medio en que vivimos, que ye do sale a nuestra virolla, que ye o nuestro refuchio, y que cal deixar a las cheneracions que vienen dezaga un Río Vero plen de vida y de belleza. Que lo solo que puede quedar-ie, son pigmentos minerals que emanan d’a tierra.

En o día d’ahiere, 6 d’octubre, o pleno d’o Parlamento Europeu votó por mayoría en contra d’o cautivo de dos nuevas variedatz de panizo transchenico d’as interpresas DuPont-Pioneer y Syngenta y a reautorización d’o panizo MON810 d’a interpresa Monsanto.

Ista noticia plega quan o sector ye tenendo serios problemas en Espanya por l’aparición d’una planta invasora clamada teosinte, que se troba en os campos de panizo y ye capaz d’intercambiar chens con o panizo modificau cheneticament. Por iste motivo, organizacions d’agricultors, consumidors y ecolochistas han solicitau a o Gobierno en funcions que no permita l’autorización de nuevas variedatz de panizo transchenico y que suspenda a comercialización de panizo modificau cheneticament. En parolas d’Andoni García Arriola, miembro d’a Coordinadera d’Organizacions d’Agricultors y Ganaders (COAG), “sería una irresponsabilidat permitir o cautivo de nuevos transchenicos en ista situación. Os panizos modificaus cheneticament que se quieren autorizar solament trayerán mas problemas a un sector que ya ye sufrindo por a presencia d’o teosinte”.

Amás, fa un anyo, 17 países y quatro rechions d’a Unión Europea prohibioron o cautivo de transchenicos en os suyos territorios, de vez que a superficie cautivada en toda a Peninsula Iberica s’ha visto disminuida en as zagueras campanyas. D’atra man, quantas interpresas retiroron os expedients d’autorización de nuevas variedatz modificadas cheneticament debant d’a evidencia d’o refuso que cheneran y a falta de mercau.

Blanca Ruibal, responsable de l’aria d’Agricultura y Alimentación d’Amigos d’a Tierra, asegura que existe “un grieu deficit democratico en a toma de decisions sobre transchenicos en a Unión Europea. A Comisión sigue presionando pa que se cautiven nuevos panizos transchenicos manimenos a opinión en contra d’a mayoría d’os Estaus Miembros y o Parlamento Europeu y a la falta de datos scientificos sobre a suya seguranza”.

Respective a la presencia de teosinte, l’Achencia Europea de Seguranza Alimentaria (EFSA por as suyas siglas en anglés) publicó recientment una opinión en a quala se subestiman os risgos que suposa a presencia d’iste pariente silvestre d’o panizo.

“Si no aturamos o cautivo de panizo transchenico nos podríanos trobar en un futuro cercano con supermalezas que dificultarían encara mas as labors d’os agricultors y podrían suponer un mayor uso de plaguicidas con nefastas conseqüencias pa o medio ambient y a salut d’as personas”, afirma Luís Ferreirim de Greenpeace.

Amigos d’a Tierra, Coordinadera d’Organizacions d’Agricultors y Ganaders (COAG), Confederación Estatal de Consumidors y Usuarios (CECU), Ecolochistas en Acción, Greenpeace, Plataforma Andalucía Libre de Transchenicos y Ret de Simients han solicitau que o Gobierno en funcions vote en contra d’a propuesta d’a Comisión Europea de reautorización d’o panizo transchenico MON810 y de l’autorización d’o panizo Bt11 de Syngenta y d’o 1507 de Dupont Pioneer, tal como recomendó ahiere o plenario d’o Parlamento Europeu.

Iste texto será locutau o proximo domingo 2 d’octubre en El bosque Habitado de Radio 3, en o qual o Ret Chóven Iberico de Slow Food contará a suya experiencia por Terra Madre, una trobada con personas productoras, transformadoras, cocineras y consumidoras de tot lo mundo, organizau por Slow Food, movimiento internacional d’o que tamién se charrará en o programa.

Slow Food ye una flor que acaba de brotar pa anunciar a plegada d’a primavera. Una flor naixida d’una simient que depositó una ovella en o desierto de Gobi, y que una muller nomada, con mans repletas de vivencias, tresladó ista semana pasada dica Turín, pa que estase mimada por unas mans finas que esbriznan cada agüerro o zafrán a canto d’a Xiloca, y pa que nusotros podésenos leyer en os suyos petalos historias d’indichenas que luitan por que dengún no les rape o suyo mayor tesoro: as suyas simients. Historias, que remeran a cuentos, de chents que puyan cada verano t’os pastos alpinos acompanyando a unas crabas qualos chens no amagan a patent de garra laboratorio, sino que guardan en ells l’adaptación mientras sieglos a l’ecosistema que las vidó naixer, pa que podamos seguir desfrutando d’o queso que antes mas se forchaba en as mans d’o lolo de Heidi.
Relatos d’indios americans que luitan con os suyos arbols y os suyos hortals contra unas multinacionals que escupen a la tierra, provocando cancer en ninas que solament pediban descubrir a vida…
…Historias que son realidatz en periglo d’extinción, y que claman a os chovens d’o mundo a unir-se y luitar por conservar o que mas une: l’alimento.
Ye cierto que luitamos contra chigants, pero nusotras somos millons.

O martes 11 d’octubre se celebrará en L’Aínsa en horario de 10 a 14 horas l’actividat formativa “Practicas Agroganaderas Sostenibles”, que organiza l’Asociación de ganaders de Bovins de raza Pirinenca d’Aragón (ASAPI) y que ye financiada por o Fondo Europeu Agricola de Desembolique Rural (FEADER) y o Departamento de Desembolique Rural y Sostenibilidat d’o Gobierno d’Aragón.

A chornada ye orientada a ganaders y tecnicos y será impartida por as doctoras Lur Epelde, investigadora d’o Departamento de Conservación de Recursos Naturals en Neiker-Tecnalia y miembro d’o Grupo d’Ecolochía Microbiana de Suelos, y Nerea Mandaluniz, investigadora d’o Departamento de Producción Animal de Neiker-Tecnalia y coordinadora d’o prochecto LIFE REGEN FARMING.

A inscripción ye de baldes, previa solicitut ninviando un correu electronico a asapi@pirineos.com u trucando a o telefono 606 94 55 56 antes d’o 7 d’octubre indicando nombre, apellidos y D.N.I. As plazas son limitadas.