Dende a plataforma pueblerina Ruralmineras (Cuencas Mineras, Teruel), lanzamos a o mundo o nuestro prochecto pa chenerar, transmitir y potenciar o sentimiento d’Argüello Rural.
Somos conscients que por muito que reclamemos y luitemos por os nuestros dreitos, somos menos, somos dispersos, y tot un sistema de creyencias nos empenta a marchar-ie. Creyemos que una d’as claus d’a repoblación y o desembolique rural sostenible ye QUERER vivir aquí. Si a chent no puede imachinar que a vida rural ye una opción, a despoblación seguirá abanzando por muito que amilloren os servicios y as infrastructuras. Y muitos no pueden, no porque sía una opción dura u pior, sino porque desconoixen a realidat rural a la marguin de l’imachinario sesgau que os medios les amuestran.
Dende que empecipió o exodo a las ciudatz, o mensache que recibimos por tot arreu ye que en os lugars no bi ha futuro y se i vive malament, en hibierno no bi ha brenca, as casas son viellas… Que si marchas t’a ciudat triunfas, que quedar-se-ie ye culpa de bella tara personal. «S’habió de tornar t’o lugar.» Un paramo de corrals cayitos y carreras vuedas ye a imachen que amuestran normalment os medios, población aviellida, un puesto vuedo, letargo… Una cantinela que se repite sin pensar, pero, ye real?
As personas que vivimos en os lugars sabemos que bi ha unatro costau d’o mundo rural que ye granizo y que no ye asinas.
Creyemos que cal empecipiar por cambiar a mentalidat, amostrar a o mundo tot o potencial que bi ha, lo bien que i vivimos y que se puede levar una vida tant plena u muito mas que en una ciudat.
Amostrar-les a os ninos lo important que ye tot o que se chenera aquí, lo necesario pa totz pa vivir integraus en o medio ambient y protecher-lo, de cudiar as viellas formas de cooperación y vida comunitaria que en os lugars encara persisten, y con tot ixo, puyar a nuestra autoestima.
Pa ixo y basando-nos en un treballo de tot l’anyo, tos proposamos instaurar o Día Universal de l’Argüello Rural, y celebrar a nuestra forma de vida en una chornada reivindicativa.
A calendata trigada pa las celebracions ye o 16 de noviembre, día d’a tolerancia, y que coincide con a epoca an prencipia a parte invisible d’a vida en o lugar: l’hibierno.
En a nuestra redolada o primer Día Universal de l’Argüello Rural será en Cuevas d’Almudén (Teruel), pero asperamos que igual como una marea, se pase a celebrar en totz os lugars de vez, igual como se celebra o Día de l’Argüello LGTBIQ+ u o 8M. O prochecto ye disponible en o nuestro blog, www.orgullorural.org, u escribindo-nos a info@orgullorural.org.
O pasau 2 de Marzo, un grupo de mas de 100 personas de tot Aragón se reunioron en Burbaguena (Teruel) con o proposito de configurar un ret d’emparo mutuo y coordinación de politicas locals, en un momento en o qual a os lugars y as comarcas rurals, mas que no nunca, les calen estratechia y organización ta sobrevivir. Dos meses y meyo dimpués, son muitas as personas que, intresadas por iste movimiento s’han meso en contacto con o Ret Riada con l’obchectivo claro y a voluntat decidida de treballar ta ixe Aragón diverso y disperso que quasi siempre s’ixuplida.
Gracias a la participación y o treballo de todas istas personas, dende A Riada anuncian a calendata y o puesto d’a II Trobada d’o ret, que se celebrará o 15 de Chunio a las 11:00 en o concello de Mezquita d’Exarc (Cuencas Mineras, Teruel), coincidindo con o festival de Mosica en a Carrera O Taborilé .
Dende a organización sinyalan que consideran que a calendata de l’evento, un mes dimpués d’as eslecions, suposa una oportunidat ta os representants municipals electos de dotar-se un programa politico centrau en lo concreto d’o que podrán pillar librement o que quieran y a o que podrán aportar o que estimen convenient. Amás, será una forma d’obtener d’atros en a suya mesma situación aduya directa ta o día a día d’os concellos, independientment d’as distintas formacions politicas.
S’anima a todas as personas que quieran treballar por os suyos lugars a asistir a la trobada, y se recuerda que, ta inscribir-se en a chenta, cal con replenar o formulario disponible en LaRiada.org . O pre será de 10€ y pueden trigar-se-ie distintas opcions.
Encara que iste movimiento, orichinau en Aragón y sin precedents en atros territorios, acaba d’empecipiar, se tiene a determinación de continar celebrando as trobadas d’a Riada con caracter semestral y itinerant, cada primavera y cada agüerro en un lugar distinto d’Aragón y intentando coincidir con eventos culturals u fiestas populars que se quieran empentar y meter en valor. En ells se darán a conoixer los abances y logros d’o ret y s’aprofitará ta treballar presencialment amás de ta fortalecer os lazos personals y enamplar o propio ret.
Fa ya tres anyos que se creyó iste blog, un medio sobre cría de bestiar en extensivo, de raso independient y sin garra refirme economico. Iste anyo, pa cubrir os gastos de mantenimiento d’o blog, he feito istas tote bags de cotón ecolochico y de comercio chusto, disenyadas y serigrafiadas por a ilustradora Pilar Serrano. O pre ye de 7€ (8,5€ con gastos de ninvio a peninsula, Balears y Canarias). Si en quiers una, escribe-me a info@mallata.com
Se siente un chemeco en a nueit. Y un rayo en metat d’a tronada ilumina a un guerrero ubrindo-se camin a caballo enta la freda espelunga. En ella, una princesa escurre cómo eslampar d’o dragón, quan de momento, apareix un hombre clavando lo suyo lanzón en a corada d’o reptil. D’a sangre d’o dragón, surte una flor… y un sinyal…
Ixa, ye a nuestra historia: la d’a vida que surte d’a muerte. La d’o trigo que naix d’a sudor que regó la nuestra tierra, y que nos da de minchar… La d’asperar a que belún nos salve, y la de que no nos dixen salvar-nos, quan nos miramos de fer-lo…
Por as nuestras venas, corre sangre de reinas y reis, y o nuestro DNA mitocondrial leva en os suyos nucleoides chenetica celta, ibera, celtibera, romana, visigoda, musulmana, chodiga, cristiana… D’a nuestra boca emanan fonemas romances, chapurquiaus de vocablos arabes. Muitas culturas y tres luengas, en dixando perder-ne una, chunto con a nuestra historia y lo nuestro pasau, olvidando que somos un mezclallo de culturas y parolas medievals que se resisten a morir.
As nuestras mans, que tamién olvidan, se fan alcordanza de vidas pasadas en rozar a riscla d’hordio, en esbriznar o zafrán, en sentir o tacto d’a lana ansotana, en rozar o braguero d’a craba moncaína, u en esquirar una merina d’os Monts Universals. As nuestras mans, recordan, licherament, a aquellas que, sin aturar, devantoron cosos y puertos fluvials, ilesias romanicas y mudechars. Que, enreligadas con tantas atras, devantoron castiellos y murallas pa protecher-se d’enemigos. Que, con delicadeza, trigoron plantas y salvoron vidas. Aquellas que se desangran en a piel d’un bombo que transmite pasión por os sieglos d’os sieglos.
Os nuestros uellos, se reconoixen en aquel pastor que guia a lo suyo rabanyo d’ovellas rasas por un maldito paisache monegrino, an que, entre l’esparto y as avutardas, troba lo suyo fogaril. Ixos uellos nuestros, que ploran en silencio en a paridera caita, en o lugar olvidau, en as piedras que os nuestros debantpasaus moldeoron y que dioron forma a la casa nuestra. A la cultura nuestra.
Y os nuestros pietz, tamién olvidan o tacto d’o sulero buralenco, o cheso, a piedra granítica que baixa por o Galligo, as alfombras de piedras que tapizan o fundo d’os nuestros ríos… olvidan que son feitos pa aprestar-nos horizonts que se fan, cada vez, más luens… Porque somos, igual que nuestra tierra, suaves como la arcilla, duros del roquedal.[i]
Somos lo que queda d’os nuestros ecosistemas. Y somos a causa de que no i quede lo que i queda. As mesmas mans que sembroron o pipirigallo, son as que espardioron verenos en os nuestros monts. As mesmas que extinguioron o bucardo, y quasi extinguen a o cluxihuesos, las mesmas que lo conservoron. Ixas mans que pintoron historias en espelungas, y que devantoron mallatas. Ixos uellos que se guidaban por as estrelas. Y uns pietz, que continan transuando y sembrando chardíns en una península que debe lo suyo nombre a un río, en o que vierten as auguas a gran parte d’as nuestras arterias. Tú, también, tiens nombre de río. Somos os atomos de carbono que quedaron d’os restos d’os que nos precedioron. Restos: que dioron vida, que facioron sulero que estioron tierra… Ixa tierra que hue somos tú y yo, y que manyana, serán atros. Somos un ovulo por fecundar en una tierra yerma.
Faciemos o más nuestro a San Chorche, encara que tenébanos a Sant Úrbez, Santa Engracia, Sant Caprasio, Santa Orosia, Santa Alodia y Santa Nunilo, Sant Martinicio… Encara que tiengamos muitos días y muita historia que celebrar… Talment, hemos de recordar, y recordar-nos, que somos a princesa, Pero no nos calen caballers que viengan a salvar-nos. Mai, mira-me a yo. Me reconoxes, mai?[ii]
Talment calga que recordemos, que descendemos d’aquels almugabars que conquistoron Neopatria, que levoron o nombre d’Aragón enta los horizonts d’os horizonts d’os nuestros horizonts, y que o nuestro miocardio traquetia, porque o nuestro territorio lo nutre, os nuestros ríos lo riegan y o nuestro pasau le dio vida. Talment debamos recordar que somos porque estiemos y seremos solo si seguimos estando.
Como una tronada en o secano, que pleva! Que crebe la tierra, que se plenen os manantials y que la escorrentía nos traiga las historias que s’eslamporon por as chamineras, as parolas que voloron con o viento. Que tremole l’horizont, que astí imos.
¡Ya están aquí otra vez aquellos montañeses! …¿O es esa tronada que grita: ¡Aragón!?[iii]
[i] Parte d’a canción Somos de José Antonio Labordeta [ii] D’o poema Mai, d’Ánchel Conte [iii] D’a canción Tronada, de La Ronda de Boltaña [iv] Chilo de baralla d’os almugabars
O pasau viernes 8 de marzo, con motivo d’o Día Internacional d’a Muller, estié en o programa Despierta Aragón, d’Aragón Radio, charrando d’o manifiesto ‘Por un feminismo de chirmanas de tierra‘ y d’a necesidat de visibilizar a las mullers rurals. Podetz escuitar a intervención a partir d’o menuto 41.15 aquí.
A primavera ya se barrunta, y bi ha una simient que chermina y que luita por creixer. Sola, prencipia a fer tranya, crebando a tierra, cinga-lanzanga, a o ritmo d’o sol, irá creixendo. Pero pa naixer y creixer tamién le fa falta l’augua. Y si no i plega, luitará por trobar-la.
Chirmana,
nusatras,
tamién somos asinas. Femos tranya como as simients. A primera vista pareixen invisibles, pero que creixen con a fuerza d’as nuestras voces en un territorio pleno de vida que no deixa de teixer comunidat gracias a las nuestras mans y as nuestras parolas.
Tamién somos parte d’a vida d’os nuestros lugars: nana, radiz, traquiu. Y como os cospins que s’encospinan en a lana d’as transuants pa cherminar a mils de kilometros d’o suyo puesto d’orichen, resistimos y luitamos. Y nos miramos a las que nos precedioron y sabemos porqué no podemos callar mas.
Dicen que o 8 de marzo ye de todas.
Pero o que se refleixa en os medios y en os retz no gosa estar asinas. Porque a ormino nos quedamos en a superficie y no imos dillá d’as ciudatz, y de nombrar y celebrar a mullers d’os cerclos estrictament culturals.
Án quedamos as mullers rurals? Cómo reivindicar-nos? Cómo quitar d’o solombrío que no se conoixe? Cómo valorar unas mans que treballan pero que, a vista de muitos, siguen estando invisibles?
As mullers rurals, en iste sistema capitalista, tecnocratico y urbanocentrico, hemos estau siempre doblement marguinadas, doblement ixuplidadas: por estar mullers y por estar rurals.
Mullers rurals,
chirmanas d’un fillo solo, mullers de, fillas de, chirmanas de, nietas de, sobrinas de…
Siempre en a uembra, pero levando tot o peso. Duenyas de brenca, pero encargadas de tot.
Ya va estando hora de rendir homenache a o treballo y a la sudor de mullers como as nuestras mayes y as nuestras mais, que tanto treballoron a tierra y que cargoron de vez con a mochila d’os cudiaus domesticos fendo-lo cutio-cutio, en o mas absoluto silencio.
Cal nombrar-las una a una.
Servir d’altavoz pa que as suyas voces retumben.
Contar que tamién fuoron: que son y serán mullers fuertes de tierra que a mayor parte d’as vegadas no podioron trigar ni decidir. Que a pur de renuncias, creixendo en una casa feita sobre alazetz de desigualdat y masclismo, nos ubrioron carrerons a las de demás.
Y no:
no nos ixuplidamos tampoco d’aquellas que hue, encara que queresen, no pueden fer vaga ni venir ta la manifestación.
Porque seguimos estando nusatras as que cudiamos: d’as personas, d’os rabanyos, d’os cautivos, d’os campos y as selvas. Y -cómo no- no podemos ixuplidar a todas ixas companyeras migrants que treballan en situacions precarias plenas d’abusos y masclismo en o nuestro territorio. Ellas, mullers, rurals y migrants, triplement marguinadas.
Insistimos.
Ya ye hora de cambiar a forma de mirar.
Siempre estiemos aquí. Treballando a tierra, cudiando, estando a radiz invisible pero esencial que feba que a casa seguise en piet. Manimenos lo dificil que lo tenioron as que nos precedioron y de lo dificil que sigue estando agora.
No, no nos fa falta que dengún no nos salve.
Queremos espacios y altavoces: Somos aquí, estiemos: queremos seguir estando.
Queremos que l’Administración no piense nomás en satisfer as demandas d’as ciudatz, porque nusatras tamién amenistamos servicios basicos. Queremos poder decidir si ir-nos-ne u quedar-nos-ie. Queremos deixar d’estar ciudadanas de segunda. Queremos soberanía alimentaria, ganadería extensiva y agroecolochía. Queremos fer comunidatz, mantener-las, aduyar-nos siempre las unas a las atras. Sentir-nos reconoixidas y refirmadas.
Y queremos estar un eixemplo pa las ninas d’o futuro, sían u no as nuestras fillas u as nuestras nietas. Queremos decir-les que ista tamién ye a suya tierra. Que ista cultura plena d’animals, arbols, territorios y personas tamién ye d’ellas. Que d’aquí venimos y ye enta án imos. Porque no queremos marchar. Porque creyemos que atras formas de vida, de relación y de producción son posibles, dillá d’iste sistema explotador, y que as nuestras marguins tienen muito que fer veyer y que nutrir.
auzolan en euskera,
a vecinal en aragonés,
facendera en lionés,
sestaferia en asturiano,
roga en gallego,
a tornallom en valenciano,
a cumuña en cantabro,
treball a jova en catalán,
a vediau en aranés…
Treballos a vecinal, mans que cudian y aduyan. Una forma natural de treballo pa fer muitas labors d’o campo u de l’entorno rural, en cheneral, que alimentaban y daban vida a os nuestros lugars. Agora, mas que no nunca, hemos de recuperar istas parolas, y –mas que mas- dar vida de verdat a tot o que istas parolas d’o nuestro territorio contienen. Hemos de seguir teixendo retz en o medio rural, contar, charrar, fer puyar a voz, aduyar-nos as unas a las atras. Formar parte d’a radiz y d’as tallas.
Porque o nuestro territorio no ye vuedo, por mas que tos haigatz encerrinau en vaciar-lo.
Porque seguimos aquí, porque somos vivas aquí.
Por un feminismo de todas,
por un feminismo de chirmanas de tierra.
***
Puedes adhibir-te a o nuestro manifiesto aquí. Chuntas, millor.
(Iste Manifiesto estió escrito por Lucía López Marco y María Sánchez. Gracias a los consellos y anotacions de Patricia Dopazo, Anna Gomar, Blanca Ruibal y Elena Medel. Y a tantas que hetz feito plegar as vuestras aportacions.)
A vegadas ixuplidamos que o cambeo climatico ye real y ha plegau ta quedar-se-ie, y lo femos mirando enta unatro costau u privando transmitir un mensache claro sobre o que habríanos de fer a o respecto. Isto ye particularment común quan se tracta de l’impacto de l’alimentación y a necesidat de reducir o consumo promeyo de productos con elevau sinyal de carbono, como a carne y os productos procedents d’a leit, en países de rentas elevadas.
A eficacia d’a modificación d’os costumbres de consumo alimentario como estratechia de mitigación d’o cambeo climatico gosa estar desacreditada por quantas vías.
Al aludir a la intensidat d’as emisions de gases d’efecto invernadero d’os sistemas ganaders y d’os beneficios de reemplazar as dietas ricas en istos productos por atras con mas conteniu vechetal, ye freqüent escuitar que existen sociedatz an o consumo de carne y derivaus d’a leit ye taso, por o que ista medida sería altament inchusta ta ixas sociedatz.
En atros casos, a reacción consiste en derivar o ficacio enta atros sectors que as suyas emisions de gases d’efecto invernadero son mas elevadas que as d’o bestiar, como o transporte u determinadas actividatz industrials.
Emisions de GEI en función d’o tipo de dieta en Reino Uniu. Scarborough et a o. (2014).
Desgraciadament, un d’os resultaus mas importants d’ixas reaccions ye esbarrar o ficacio d’o debat, mientres que garra d’os argumentos anteriors aduya a responder a pregunta orichinal: ye necesario reducir o consumo promeyo de carne y leit allá an o consumo ye elevau ta mitigar o cambeo climatico?
Pro, no existen recetas solas ta resolver os prencipals problemas ambientals en garra sector. Pro, i hai personas que tasament minchan carne y derivaus d’a leit y, allora, no pueden reducir o consumo d’istos productos, y mesmo podrían aumentar-lo. Y, pro, existen atros sectors con altas emisions de gases d’efecto invernadero y sobre os quals cal actuar.
Dito isto, y una vegada feitas as analises pertinents dende o rigor y obchectividat scientificos, s’amenista a transmisión de mensaches claros y inequivocos sobre as oportunidatz de mitigación en cada sector. Y, quan existe un amplio consenso sobre as causas d’un problema y as medidas que pueden contribuir a abordar-lo, a ciudadanía aspera y se mereixe claridat en a información que recibe por parte d’a comunidat scientifica y os liders politicos.
Por qué ye tant complicau reconoixer a necesidat u, mesmo, os beneficios de reducir o consumo promeyo de carne y leit en sociedatz como a nuestra?
I hai quantos aspectos atribuius a la producción ganadera y o consumo d’os suyos productos que marcan o debat. Aquí nos centraremos en cinco d’ells, refleixaus en as siguients afirmacions: “o consumo de carne y leit fa parte d’a nuestra cultura”, “a carne y os derivaus d’a leit son saborosos”, “a ganadería tamién ye parte d’a nuestra cultura”, “os medios de vida de qualques personas y a conservación d’as nuestras arias rurals dependen d’a ganadería” y “a carne y os productos d’a leit son elementos esencials ta una dieta saludable”.
Exploremos istas cinco creyencias.
Minchar carne y leit ye parte d’a nuestra cultura.
Isto ye cierto, y a preservación d’a cultura ye, en prencipio, bella cosa deseyable. Siempre que ista cultura no confronte con institucions mas valurosas como, por eixemplo, o Estau de dreito u o mantenimiento d’a seguranza.
Amás, en istos países, una parte important d’o consumo de carne y derivaus d’a leit gosaba provenir d’a cría de crabas y ovellas, en contraste con os costumbres de consumo actuals basaus en productos mayoritariament procedents d’o focín, o pollo y o vacuno.
Sí, en son, pero tamién en son as trunfas fritas y no en minchamos totz os días. Amás, no son os solos alimentos saborosos, sin mencionar que o placer asociau con minchar diferents tipos d’alimentos no ye un atributo propio d’a virolla, sino un goyo adquiriu y modulable.
O goyo por a carne y os derivaus d’a leit s’ha incrementau en as culturas gastronomicas d’o sud d’Europa entre os zaguers decenios, convertindo-se en os reis y reinas d’os deseyos culinarios. En qualques casos, como Espanya, isto succedió rapidament como resultau d’anyos de privación.
O consumo de carne yera un simbolo d’estatus, riqueza y poder, y isto la convertiba en una opción ta minchar muit apreciada: una situación que ha perdurau dica hue. Asinas, encara que hemos colocau a carne y a leit como os alimentos basicos de cada banquete u menú d’o día, no ha estau por estar mas saborosos que a resta de virolla.
3. A ganadería tamién forma parte d’a nuestra cultura.
A ganadería tradicional ha sabiu acumular y conservar una vasta conoixencia sobre practicas productivas adaptadas a las condicions ambientals d’o suyo entorno y resilients frent a las adversidatz climaticas.
Manimenos, a elevada demanda actual de productos d’orichen animal fomenta un tipo de ganadería que ixuplida sieglos de conoixencia acumulau y conduz a la destrucción d’a ganadería extensiva, valuroso atributo d’o nuestro acervo cultural, asinas como a la perda de paisaches y hábitats naturals de gran valura.
4. Qualques personas dependen d’a ganadería.
Encara que isto ye un feito, qui obtienen a mayor parte d’as ganancias d’a ganadería no son as personas que veyemos cudiando d’istos animals quan puntualment abandonamos a ciudat ta ir t’o campo. A tendencia ent’a intensificación ye acompanyada por l’aumento en a grandaria d’as explotacions ganaderas y a disminución d’o numero de granchas, como ocurre en países como Reino Uniu u Francia.
A forma en a quala iste tipo de torres se relaciona con l’entorno ye muit diferent a la d’a ganadería tradicional, y mientres que ista zaguera contribuye a o desembolique rural, qualques estudios realizaus en países como Estaus Unius amuestran cómo a producción animal industrial no solament no fixa a población, sino que tamién destruye l’emplego.
Rabanyo en pastoreo en Torreciella de Val Madriz (Zaragoza). Lucía López Marco
D’atra man, os elevaus rans actuals de consumo de productos d’orichen animal solament son asequibles ta la mayoría d’a sociedat si o bestiar se cría de forma intensiva, reducindo a o maximo os costes d’a producción. En conseqüencia, a mayoría d’as vegadas, os ciudadans europeus consumimos carne y productos lácteos que a suya producción ye controlada por grans companyías de producción intensiva, que fan servir piensos que a suya materia prima ha recorriu milars de kilómetros antes d’engordar os silos, reducindo de forma ostensible os beneficios ta os ganaders tradicionals y o medio rural.
5. A carne y os derivaus d’a leit son esencials en as nuestras dietas.
D’atra, no ye estrictament necesario consumir alimentos d’orichen animal ta levar una dieta saludable. Ye necesario tener prou aporte calorico y de proteínas, calcio, fierro, y atros nutrients, vitaminas y minerals que componen una dieta saludable, pero istos se pueden adquirir seguindo una dieta basada en o consumo de vechetals.
Por contra, o recient cambeo de dieta en países mediterranios como Espanya enta dietas con alto conteniu en proteína animal, alimentos procesaus, dulces y grasas saturadas, como as qualas predominan en l’actualidat en Espanya y atros países mediterranios, sí ye perchudicial ta la salut y contribuye a l’aparición de malotías no transmisibles asociadas a l’alimentación.
Alavez, a carne y a leit no son esencials ta seguir una dieta saludable, y, encara que pueden contribuir a completar nuestras demandas nutricionals, solament represientan un consumo saludable si s’incluyen en dosis muito menors a las qualas se dan en l’actualidat en países de rentas altas.
Ye dificil comunicar y asumir a necesidat d’adoptar en os nuestros modos de vida os importants cambeos que se precisan ta privar as piors conseqüencias d’o cambeo climatico. Pero ubramos os uellos: tenemos un decenio ta invertir a tendencia d’as emisions globals de gases d’efecto invernadero, y i hai muito treballo por fer.
Reducir o consumo de carne y leit -y trigar productos d’orichen animal provenientes de ganaderías en extensivo y de cercanía- en aquellas sociedatz con un consumo elevau ye posible, positivo ta la planeta, bueno ta la nuestra salut, accesible ta todas aquellas personas que deseyan reducir a suya impacto medio ambiental, y podría beneficiar a os sistemas ganaders tradicionals y de chicot-mediana grandaria.
Alavez, por qué no habría d’estar parte d’as estratechias de mitigación d’o cambeo climatico? Y por qué no comunicar-lo clarament? En a batalla contra o cambeo climatico, cada acción conta.
*Foto de capitero: Torre de cría intensiva de pollos d’a provincia de Huelva. Eduardo Aguilera
Fa tiempo que me rondaba la ideya de fer una revista, pero nunca no remataba de trobar o momento, y con motivo d’un charrazo lo pasau luns 11 de febrero a l’alumnalla d’a Escuela d’Aragonés Nogará, decidié que sería bien, agora que escaseixen más que no nunca as revistas en aragonés, y que sería más didactico, en cuentas de fer una presentación, fer una revista con bels d’os articlos que he iu publicando mientras os zaguers cuatro anyos tanto en Mallata como en atros medios, asinas que, astí va o Número 0 d’a Revista Mallata, en aragonés, que podetz descargar en pdf aquí. Si tos fa goyo, talment m’anime a quitar-ne mas, con articlos nuevos, asinas que si tos cuaca, decitz-lo en comentarios 😉
Os días 8 y 9 de febrero se presentará en Chaca, Uesca y Zaragoza a experiencia de repoblación rural d’o prochecto Empenta Artieda. A mini chira ha estau organizada conchuntament por a Catedra sobre despoblación y creyatividat d’a Universidat de Zaragoza y Empenta Artieda, estando objetivo d’as trobadas sensibilizar en as ciudatz sobre a problematica d’a despoblación explicando una experiencia local d’exito en la luita contra ista. Amás, se quiere chenerar un foro d’aprendizache en o qual as personas intresadas puedan aprender d’o treballo desembolicau en a localidat.
Artieda ye un chicot lugar de 80 habitants empadronaus con un fuerte caracter, marcau por la luita historica d’os suyos vecins en contra d’o recrecimiento de l’embalse de Yesa. A consciencia comunitaria d’a localidat ha permitiu encetar una luita contra un enemigo mas silencioso que no l’entibo: a despoblación. Empenta Artieda ye un proceso d’Investigación-Acción ta la repoblación en o qual s’ha involucrau tot o lugar. En primera instancia se realizó un estudeo sociolochico que derivó en una reflexión colectiva, sinyalando os prencipals problemas d’a choventut ta asentar-se en o lugar. Gracias a ista reflexión se disenyoron os programas d’acción d’emplego, vivienda, socialización y cudiaus que han permitiu a plegada de diez nuevos vecins.
O prochecto d’Empenta Artieda cumple 2 anyos dende que s’encetó y ya ye en disposición d’ofrir os suyos primers resultaus: En l’ambito de l’emplego s’han chenerau os treballos ligados a os tecnicos d’Empenta, amás d’a plegada d’a interpresa social Senderos de Tella y as iniciativas d’autoempleo de Cima Norte y Sociolochía. A ran de vivienda s’han ubierto tres viviendas ta logar, amás d’atras dos que son estando reformadas. En l’ambito d’a socialización ha permitiu a realización de decenas de trobadas y actividatz locals, amás d’empentar iniciativas comarcals como a liga de futbol sala Viello Aragón u ExpoChoven. Por a suya parte, s’ha treballau en os cudiaus con o prochecto de participación adolescente “Empenta Chovenalla” y os servicios de “Envejece en tu pueblo“, de forma coordinada con Sigüés, Mianos y Salvatierra.
En as presentacions os tecnicos d’o prochecto explicarán a experiencia y os programas desembolicaus, seguidament s’explicarán as propuestas d’emprendimiento surtidas entre istos dos anyos: Sociolochía charrará d’a metodolochía que ha feito posible a experiencia, amás de presentar o prochecto “Empenta tu pueblo“, Senderos de Tella amostrará a suya propuesta de sinergia publico-privada y a experiencia d’enviellimiento digno “Envejece en tu pueblo“, mientres que Cima Norte charrará d’o suyo meyo de comunicación d’o Pirineo immerso en as nuevas lochicas d’a comunicación. Ta rematar, RibaGuifi exposará a importancia d’os retz d’internet ta o desembolique d’as zonas rurals y a suya propuesta de creyación y chestión de retz comunitarios
As trobadas tendrán puesto en:
– Chaca o viernes 8 de febrero a las 19:00 en a casa de cultura María Moliner.
– Uesca o sabado 9 de febrero de maitins a las 12:00 en o centro cultural o Matadero.
– Zaragoza o mesmo sabado 9 de febrero de tardes a las 18:30 en o centro d’Historias.
A dentrada en totz ells será libre dica completar aforo.
