Amás, paralelament tendrá puesto a I Feria d’Alternativas a o Cambeo Climatico (organizada por l’Alianza por o Clima) con l’obchectivo de teixir alianzas ta una vida sostenible.
A VI Feria d’o Mercau Social, contará con stands informativos y de venda de productos y servicios d’entidatz d’Economía Social y Solidaria, an se darán a conoixer as suyas alternativas en alimentación ecolochica y de proximidat, finanzas eticas y solidarias, transporte sostenible, comercio chusto, enerchías renovables, chardinería, construcción, textil, ocio y cultura, muebles, artesanía, hostelería, construcción, asesoría, educación, comunicación y diseño, cudiaus…
Mientras toda la Feria se podrá desfrutar d’as diferents actividatz, qualo obchectivo ye fer-nos reflexionar y visibilizar a economía social y solidaria dende diferents angulos (charradas, tallers, animación infantil, exposicions, conciertos…)
A finalidat d’a Feria ye visibilizar prochectos que treballan en común por a sostenibilidat d’a vida, partindo d’a premisa de cudiar: cudiar a vida, as personas, l’entorno y os procesos u habitos de consumo, a producción u as relacions socials. Dende l’epicentro cudiar,s’ha dividiu a Feria en siet sectors que vinculan a os prochectos y entidatz de Mercau Social con as actividatz que desembolican, con l’obchectivo de reunir en un mesmo espacio a todas as actrices y actors que participan en a Economía Social y Solidaria ta celebrar, trobar-se, intercambiar y, en definitiva, aprender, chugar, recuperar, acompanyar, facilitar, participar, construir, alimentar, arropar, soniar, viachar, comunicar y creyar colectivament.
O Pastoreo Racional Voisin ye un sistema que amillora a eficiencia d’a producción fendo un uso racional d’os recursos. O suyo creador estió André Voisin, qui definió o sistema de pastoreo racional como “a mas abanzada y eficient tecnica de maneo d’os pastos, basada en armonizar os prencipios d’a fisiolochía vechetal con as necesidatz qualitativas d’os animals, con a millora creixent d’o suelo, a traviés d’os procesos bioticos, baixo a intervención de l’humán”.
Estió Voisin qui enunció as quatro Leis Universals d’o Pastoreo Racional. Se les denomina universals, ya que pueden aplicar-se en qualsiquier puesto d’o mundo, siempre que i haiga pasto, independientment d’o clima, d’as condicions edafolochicas, etc… As leis d’o pastoreo Voisin son as siguients:
1. Lei d’o Reposo: Ta que un pasto tallau a dient por l’animal pueda dar a suya maxima productividat, ye necesario que, entre dos cortes succesivos a dient, haiga pasau o tiempo suficient, que permita a o pasto: almacenar en as suyas radices as reservas necesarias ta un encieto de rebrote con rasmia y un desembolique impetuoso y rapido (realizar a suya “flamarada de creiximiento”).
Ye dicir, o pasto ameneste descansar entre un pastoreo y o siguient o necesario ta que las plantas puedan recuperar a suya aria foliar y acumular reservas t’o suyo rebrote
2. Lei d’a Ocupación: O tiempo global d’ocupación d’una parcela por o bestiar habrá d’estar prou corto como ta que o pasto tallau en encetar o tiempo d’ocupación no torne a estar tallau a dient por l’animal, antes que ells no deixen la parcela.
Ista lei fa referencia a que o periodo que pasan os animals en una parcela, no puede estar tant largo como ta permitir que tallen o rebrote d’o pasto, por tanto, s’uniría con a Lei d’o Reposo, ya que se sería tallando-se o pasto antes d’haber recuperau y d’haber aconseguiu a “flamarada de creiximiento”, ye dicir, que se debilitaría cada vez mas dica plegar a o punto que o pasto “no rinda”.
3. Lei d’os Rendimientos Maximos u Lei d’as Categorías: Ye necesario aduyar a os animals de mayors exichencias nutricionals a pastar a mayor cantidat posible y que o pasto sía d’a millor calidat. Isto ye, cal aduyar a l’animal ta que consuma a mayor y millor cantidat de pasto.
4. Lei de Rendimientos Regulars u Lei de Permanencia: Ta que un animal de rendimientos regulars, ye necesario que no remaneixca mas de tres días en una mesma parcela. Dau que quanto mas tiempo remaneixca o bestiar en una parcela, menor será a cantidat y a calidat d’o mesmo.
Dende meyaus d’o sieglo XX, as ideyas planteyadas por Voisin s’han desembolicau en distintos países y han iu evolucionando gracias a las aportacions de distintos profesionals. Un d’os conceptos centrals que s’han incluyiu en o sistema de Pastoreo Racional Voisin, ye o de treballar con a vida d’o suelo, dau que fa amillorar a fertilidat d’o mesmo, a producción forrachera y a producción animal. Ista visión d’o pastoreo se fusiona con l’Agroecolochía, entendendo ista como “a conducta de producción agropecuaria que reincorpora y reelabora conceptos agronomicos que estioron ixuplidaus por presión d’a clamada Revolución Verda”.
Hue, mierques 16 de setiembre, esfiendo o mío treballo fin de master. Ha estau un treballo en o qual he invertiu muito tiempo pero en o que, mas que mas, he aprendiu muitas cosetas. Lo mas important ye que he aprendiu cosetas que -encara- no son en os libros. O qual, tamién me fa preguntar-me quántas cosas habrán quedau sin documentar y descansarán ta cutio en bell calaxo d’a historia.
Entrevistando a Pedro José Gericó, de Sallent de Galligo
O treballo que hue esfiendo se titula Etnoveterinaria en a Val de Tena y Tierra de Biescas. A etnoveterinaria ye a conoixencia y/u l’aplicación de remeyos naturals, transmitius de forma oral y dirichius t’a prevención y curación d’as malotías d’os animals. Ye dicir, a etnoveterinaria estudea cómo se curaba a os animals quan no i heba industrias farmaceuticas. Iste tipo d’estudios cobran gran intrés agora que ye puyando o numero de ganaders que optan por sistemas de producción ecolochicos, dau que o Reglamento vichent de Ganadería Ecolochica (CE) Nº 834/2007 (CE, 2007) sinyala que “s’utilizará preferentment a fitoterapia, que utiliza plantas medicinals en forma d’esencias y extractos y a homeopatía, que permite tractar a l’animal sin deixar residuos en os suyos productos; os sistemas de cría se basarán en a utilización maxima d’os pastos, seguntes sían disponibles a lo largo de l’anyo, habendo d’estar constituida a ración diaria, a o menos un 60% d’a materia seca por forraches”. Motivos por os quals resultan imprescindibles iste tipo de treballos que meten a man de ganaders y tecnicos recursos muit accesibles pero cada vez mas desconoixius.
L’augua d’a decocción d’o barrabón se fa servir ta cicatrizar as feridas
T’a elaboración d’o estudeo, s’han realizau 31 entrevistas a 30 informants, s’han rechistrau un total de 92 elementos emplegaus con fins medicinals, reproductivos u de producción animal en a Val de Tena y Tierra de Biescas (79 taxons vechetals diferents perteneixients a 47 familias botanicas, 16 remeyos d’orichen vechetal, 1 fungo, 13 remeyos d’orichen animal, 9 minerals, 2 quimicos y 8 manipulacions u atros remeyos).
Manimenos, un 43% d’as personas entrevistadas tiene mas de 80 anyos, mientres que menos d’un 17% en tiene menos de 60. A meya d’edat d’os informants ye de 74 anyos, lo qual mete de manifiesto l’abanzada edat d’as personas con conoixencias en ista materia, y por tanto, a situación de periglo d’extinción en o qual se troban istos sabers, que son, agora, mas necesarios que no nunca a causa d’a necesidat d’alternativas a os productos farmaceuticos.
A piedra d’Ordovés ye utilizada ta curar multiples mals, tanto de personas como d’animals.
Ha estau, prou que si, un treballo beroyo, en o qual 30 personas, que no me conoixeban de brenca, decidioron compartir con yo lo que sabeban, lo que heban aprendiu d’os suyos debantpasaus. Un treballo de formación profesional, sí, pero más que más un treballo de trobada con una cultura, una luenga, un paisache y una forma de vida milenarias. Un treballo que no ha feito que empecipiar, porque conto los días ta retrobar-me con istas personas, y ta conoixer a muitas atras y seguir emplindo lo cuaderno de sabers machicos y ancestrals. Porque quiero continar escuitando historias de mullers que cada nueit de Sant Chuan, antes que no amaneixca, salen a recolectar flors de sabuco, tolonxina, menta, malvas… ta confeccionar un ramo que dimpués deixarán ixucar y con o qual ferán saumerios ta curar multitut de mals. Porque quiero seguir escuitando historias d’hombres que penchan en as parideras piedras planas con foraus naturals. Porque quiero seguir escuitando testimonios de chent que acude a curanderos y que bebe augua en la que han ficau una piedra que salió d’o cuerpo d’una cullebra. Porque quiero que Luis, en o suyo polidismo aragonés pandicuto, contine contando-me os secretos que un día le’n contó o suyo güelo. Porque quiero seguir veyendo ovellas negras en os rabanyos, protechius por mostins. Y porque quiero que as siguients cheneracions tamién puedan coleccionar remeyos y parolas que se niegan a morir.
Dignidat. Luita. Treballo. Paisache. Belleza. Libertat. Ecosistema. Goyo… De tot isto y muito mas tracta As voces de l’hortal, un documental dirichiu por Ángela Palomares y basau en o treballo que entre 2013 y 2014 levó a cabo o grupo d’investigación d’a Universidat de Granda PlanPais Paisaje Andaluz.
En a gravación, s’exposan iniciativas de producción y consumo de productos ecolochicos en a Vega granadina y s’amuestra l’hortal como alternativa a o desemplego, contrimostrando que se puede vivir d’o campo.
O proximo luns 31 d’agosto prencipian en A Fueva as Chornadas Ganaderas José Luis Gracia Chapullé, ‘Chapu’, organizadas por a Fundación t’a Conservación d’o Cluxiuesos (FCQ) y os sindicatos agrarios Unión d’Agricultors y Ganaders d’Aragón (UAGA) y l’Asociación Agraria de Chovens Agricultors (ASAJA) y que versarán sobre distintos afers relacionaus con a ganadería extensiva. Istas chornadas tendrán puesto de forma paralela a la XXX Expoferia de Sobrarbe que se celebrará os días 4, 5 y 6 de setiembre en o Castiello de L’Aínsa y qualo programa se puede consultar aquí.
As Chornadas Ganaderas José Luis Gracia Chapullé escomencipiarán o luns en o Salón d’Actos d’o Concello de Tierrantona a las 19 h. con una conferencia sobre “Chestión agricola de purins y fiemo”, impartida por D. Francisco Iguacél, tecnico d’o Departamento de Desembolique Rural y Sostenibilidat d’o Gobierno d’Aragón; continarán o mierques 2 de setiembre a las 19 h. en o Salón d’Actos d’o Concello de Broto con a ponencia impartida por D. Pablo Martínez, advogau d’o departamento de servicios churidicos de UAGA, que tractará sobre “Transferencias patrimonials y transferencias de dreitos d’a PAC”. O chueves 3, en a Torre Homenache d’o Castiello de L’Aínsa a las 19 h. tendrá puesto a conferencia y posterior mesa redonda “Present y futuro d’as A.D.S.” por D. Enrique Novales, Director Cheneral d’Alimentación y Fomento Agroalimentario, y D. Ángel Samper, secretario cheneral d’Asaja Aragón. Contino, a las 20h., se i charrará de “Plans de Desembolique Rural” d’a man de D. José Antonio Salas, tecnico d’ASAJA y miembros d’o CEDESOR.
O sabado 5, a las 17.30, tamién en a Torre Homenache d’o Castiello de L’Aínsa, D. Julio Guiral Pelegrín, de l’Instituto d’Estatistica d’o Gubierno d’Aragón, impartirá la charrada “A ganadería extensiva de montanya y o Ret Natura 2000” y a las 18.30 D. Roque Vicente, Director Cheneral de Chestión Forestal i charrará de “Recuperación de pastos en l’amonte forestal”, D. Manuel García Pelaire, chefe de l’aria de prochectos de l’aria enerchetica d’o CIRCE, de “Gasificación d’a fusta ta calefacción”, y D. Carlos Lalueza, cherent d’a interpresa Chirmans Lalueza-Trallero, de “Experiencia d’asclau de fusta en Sobrarbe”.
Hue se conmemora o Día Internacional d’a Choventut y a organización choven d’a Unión de Chicotz Agricultors y Ganaders, UPA Choven, quiere recordar as estorbaduras que os chovens sufren a la hora de treballar y vivir en o medio rural. “L’alto aviellamiento de l’agricultura y a ganadería, sectors estratechicos, ye un periglo t’o futuro economico d’Espanya”, advierten dende UPA. Ta revertir ista situación a organización ha elaborau un decalogo de medidas.
L’alarmant aviellamiento d’a población activa d’o campo ye un d’os problemas estructurals de l’agricultura y a ganadería espanyolas. “Se tracta d’un problema vital”, advierten dende UPA Choven, “no solament porque condiciona a eficacia economica d’as explotacions, a suya capacidat d’innovar, competir y adaptar, sino tamién porque determina o relevo cheneracional y o futuro d’istes dos sectors estratechicos ta qualsiquier país”.
L’actividat agraria ye un treballo practicament viedau a os chovens en Espanya. “Ye quasi imposible que un choven se convierta en ganadero u agricultor si no viene d’una familia con a explotación ya establida”, explican en UPA Choven. Mesmo ta aquells con familias que treballan o campo existen muitas estorbaduras que impiden que sigan con o negocio familiar y abandonen o campo. As mas problematicas son l’alto pre d’a tierra, a richidez d’o mercau, a escasez d’arrendamientos y l’enorme capital necesario ta emprender istas actividatz.
Amás d’istas barreras, os chovens tienen atras que afectan a toda a comunidat, como son l’acceso a servicios, infrastructuras y dreitos. Son basicos t’os ciudadans d’as urbes, pero l’acceso ye cada vez mas complicau t’a chent d’o medio rural. UPA sinyala que os eixemplos mas alarmants son “a merma d’instalacions sanitarias y educativas, a deficient ofierta de meyos de transporte y o menor acceso a las comunicacions”.
Manimenos, istas causas son “reversibles si as autoridatz se meten ya mans a la obra”. Ta remediar istes problemas y fortalecer a la choventut d’o rural, UPA Choven proposa o siguient decalogo de medidas:
Emparo mas contundent a la encorporación d’os chovens. Una politica activa d’emparo a la encorporación ha d’enmarcarse en distintos aspectos como las aduyas dreitas, prestamos a baixo intrés, exenciones d’imposaus de transmisión y sucesión, flexibilidat d’avales, etc.
Plan d’acceso de tierra ta chovens. Dau l’encarecimientos especulativo d’o mercau d’a tierra, cal y urchent elaborar medidas dirichidas a favoreixer a ofierta y arrendamiento de tierras, asinas como a venda d’as mesmas.
Mayor facilidat en a transmisión d’explotacions. Se debe facilitar a transmisión d’explotacions, especialment en os casos de cese abanzau de l’actividat agraria, eliminando obstaculos de tipo restrictivo que impidan u dificulten l’acceso a la titularidat d’as explotacions.
Creyación d’organismos de transmisión de tierras. No se puede concebir un programa de chubilación anticipada sin a constitución d’organismos de transmisión de tierras que actúen fendose cargo d’as tierras en arrendamiento u transmitidas en propiedat, con l’obchecto de transmitir-las posteriorment seguntes as siguients prioridatz: agricultors chovens, ampliación de superficie en chicotas explotacions y conservación d’o medio rural.
Exención d’os gastos de transmisión de tierras a las chicotas explotacions (gastos de notaría, rechistro de propiedat, impuesto de transmisions, etc.). Asinasmesmo, s’han de facilitar aduyas en forma de subvencions y/u creditos t’os chicotz y medianos agricultors que compren tierras a os agricultors que s’aculgan a o programa y puedan asinas aumentar a dimensión d’as suyas explotacions.
Amillora de l’entorno rural. No podemos consentir a existencia de ciudadans de primera y ciudadans de segunda. As personas que habitan o rural espanyol han de tener os mesmos dreitos, servicios y oportunidatz que aquells que viven en as ciudatz. Por tanto, ye necesario amillorar as infrastructuras y os servicios en o campo ta que os suyos habitants tiengan un acceso real a la sanidat, a la educación.
Facilitar l’acceso a la chubilación anticipada. Un programa de chubilación anticipada debe estar facilment accesible, tanto t’os agricultors que deseyan cesar en a suya actividat, como ta aquells a el qual se traspasan as tierras.
Desembolicar politicas que fomenten l’uso d’as nuevas tecnolochías d’a información y a comunicación dentro d’o medio rural. Isto no solament ta modernizar a nuestra producción, tamién ta romper a brecha dichital que se produz entre a ciudat y os lugars y que asinas os habitants de totz dos tiengan o mesmo acceso a la libertat d’información y d’expresión.
Prioridat ent’os agricultors chovens. Culaquier medida que pretenda establir diferencias u criterios de prioridat entre explotacions agrarias ha de tener como elemento diferenciador, dende un punto de vista positivo, a las explotacions que os suyos titulars sían agricultors chovens.
Enfortimiento d’os programas formativos y de l’asociacionismo chuvenil. Tanto a formación d’os agricultors y ganaders chovens como constituye una d’as bazas fundamentals ta aconseguir una agricultura moderna y competitiva. Por ixo, cal que l’Administración empare con mas decisión os programas de formación que realizan as organizacions agrarias.
Nos femos ideya d’a cantidat de combustible fosil que contien a nuestra virolla? Si tomamos como eixemplo un sandwich y imos analisando ingredient por ingredient, descubrimos que ta elaborar o pan, primero un agricultor habió de plantar o cereal, t’o que amenestió un tractor. Dimpués habió d’arar o campo, esmicazar a tierra y sembrar as simients, y ta que o cereal medrase, probablement facio servir quimicos ta que protechesen as culles, como funchicidas, herbicidas, insecticidas… Totz ells elaboraus a partir de petrolio. Y t’os nutrients, fertilizants quimicos, a mayoría d’os quals derivan d’o gas natural. Quan o cereal ha madurau, cal cullir-lo. Contino o grano se seca con grans calefactors y se transporta (usando mas gasolio) t’o suyo procesau. Amás, qui se dedican a la fabricación d’o pan de molde son chigants linias industrials.
O siguient ingredient que amaneixe en o sandwich ye o pernil, que, obviament, proviene d’o tocin. A istes animals se les alimenta a pur de grano, por o qual s’invierte mas enerchía. Un cerdo puede minchar quasi una tonelada de pienso. Normalment naixen en una grancha, s’engordan en unatra, se levan t’o matadero y d’astí t’a industria transformadora, en a quala seguirán utilizando enerchía t’o suyo procesau y dende a quala saldrán camions ta transportar o producto final. En o sandwich tamién i hai una trista muestra de vechetals, que estioron transportaus y cautivaus en invernaders climatizaus, de nuevas, una gran cantidat d’enerchía.
Totz istes productos estioron cocinaus y transportaus muitos kilometros en camions refricheraus antes de plegar en iste sandwich, asinas que, como a gran parte d’a virolla que consumimos, ye absolutament pleno de petrolio. Por desgracia, si no existisen plantas petroliferas, seríanos muertos de fambre. De feito, mesmo en granchas chicotas u en granchas ecolochicas, sin a enerchía d’os combustibles fosils, o cautivo y a producción d’alimentos serían inviables.
Qué pasará quan rematemos con as reservas actuals de petrolio? Existen alternativas? Iste documental, titulau Una Grancha t’o Futuro, se mira de buscar solucions a un problema inevitable.
De vez, se feba a devantadera en Millau, localidat situada en o Macizo Central francés an a prencipal fuent d’ingresos d’un amplio sector d’os ganaders ye a producción d’iste tipo de queso, un establimiento d’a conoixida cadena de restauración estadounidense McDonald’s. Os afectaus no tardoron guaire en unir conceptos y o 12 d’agosto d’ixe anyo, 300 ganaders se dioron cita en o McDonald’s de Millau y estioron desmontando-lo pieza por pieza. O desmantelamiento d’o establimiento hese quedau en simple anecdota de no estar porque diez d’os ganaders que participoron en a “deconstrucción” d’o mesmoestioron condenaus a tres meses de garchola, de traza que a noticia s’extendió por toda Francia y gran parte de l’extranchero. Asinas estió como os consumidors franceses s’enteroron d’os arancels imposaus a o queso Roquefort en EEUU y decidioron emparar a os suyos paisanos productors, aumentando o consumo de Roquefort en Francia y acudindo a os eventos d’emparo a os encausaus, plegando a chuntar dica 47.000 personas en un acto en Millau (mas d’o doble d’a población d’a localidat).
Pero no fa falta conoixer a historia d’o caso McDonald’s de Millau ta saber que os agricultors y ganaders franceses siempre han sabiu esfender millor os suyos intréses que os espanyols, encara que totz se troban baixo as normas d’a mesma politica agraria comuna, y ye pro solament con cruciar os Pireneus ta parar-ie cuenta. Mientres que pasando o Portalet qualsiquier atardexer de verano te trobas a os ganaders muyindo a man as suyas uellas y vendendo os suyas quesos en a mesma grancha, en o costau de Formigal queda solament un productor de queso en Sallent de Galligo, pero iste ha de vender os suyos quesos en o supermercau d’o lugar. En a vertient sud pirenenca, qualsiquier producto ha de comprar-se siempre en un establimiento destinau a ixo, por desgracia no ye tant facil vender en a mesma grancha.
D’atra man, tot y que as eslecions chenerals se troban muito mas cercanas en o tiempo aquí que en Francia y d’a importancia que tiene, mas que mas, en bellas comunidatz, o voto rural, garra lider de garra partiu politico s’ha solidarizau publicament con o sector, ni pareixe que lo vaigan a fer. Será que os agricultors y ganaders d’iste costau d’o Pireneu son muit pacificos y os politicos no los toman en serio?
O 80% d’a producción mundial de carne de tocín y de ternera ye en mans de quatro interpresas multinacionals.
O 60% d’os cereals producius en o mundo, son destinaus a la fabricación de piensos.
A ganadería ye a prencipal causa de deforestación de l’Amazonía.
O sector ganadero ye responsable d’o 18% d’as emisions de gases d’efecto invernadero.
A producción industrial de carne contamina mas que tot o transporte d’o mundo.
A ganadería industrial consume cantidatz inchents d’hormonas, antibióticos y pesticidas.
Solament en EEUU se producen a l’anyo 23 millons de kilos d’antibioticos. A metat son destinaus a la producción ganadera.
Ye contrimostrau que a ganadería intensiva ye insostenible dende todas as anvistas. Por qué no le damos a tornada a o sistema y empecipiamos a producir ecolochicament?
A producción ecolochica de birolla se refiere a sistemas de producción agricola, ganadera y d’elaboración de productos agroalimentarios, que se mira de producir alimentos libres de contaminants quimicos, d’alta valor nutricional y organoleptica, producius en sistemas que protechan y amilloren o meyo ambient, que respecten o buenpasar animal y que permitan obtener una renta suficient a os ganaders y agricultors. Amás, seguntes un estudeo publicau por a FAO, iste tipo de producción podría alimentar a toda a población mundial en l’anyo 2050.
Ta que conoixcatz millor qué ye a ganadería ecolochica y entendatz totz os suyos ‘porqués’, tos recomiendo iste documental, en o qual s’explican de forma sencilla de vez que didactica todas as razons por as qualas cal achugar por a ganadería ecolochica, a la par que totz os problemas que iste tipo de producción presienta. Aspero que tos faiga goyo!
![[cml_meya_alt itz='820']programa mescoop[/cml_meya_alt]](http://mallata.com/wp-content/uploads/2015/09/programa-mescoop.jpg)
![[cml_meya_alt itz='740']beef-907308_1280[/cml_meya_alt]](http://mallata.com/wp-content/uploads/2015/09/beef-907308_1280.jpg)
![[cml_meya_alt itz='739']pasto[/cml_meya_alt]](http://mallata.com/wp-content/uploads/2015/09/calf-433000_1280.jpg)
![[cml_meya_alt itz='722']Entrevistando a Pedro José Gericó, de Sallent de Gállego[/cml_meya_alt]](http://mallata.com/wp-content/uploads/2015/09/sallent.jpg)
![[cml_meya_alt itz='717']L'augua d'a decocción d'o barrabón s'utiliza ta cicatrizar as feridas[/cml_meya_alt]](http://mallata.com/wp-content/uploads/2015/09/barrabón.jpg)
![[cml_meya_alt itz='721']a piedra d'Ordovés ye utilizada ta curar multiples mals, tanto de personas como d'animals.[/cml_meya_alt]](http://mallata.com/wp-content/uploads/2015/09/piedra-de-ordovés-e1442310144214.jpg)
![[cml_meya_alt itz='693']Expo-feria-2015-362x500[/cml_meya_alt]](http://mallata.com/wp-content/uploads/2015/08/expo-feria-2015-362x500.jpg)
![[cml_meya_alt itz='689']image-0001[/cml_meya_alt]](http://mallata.com/wp-content/uploads/2015/08/image-0001.jpg)
![[cml_meya_alt itz='677']hand-351277_1280[/cml_meya_alt]](http://mallata.com/wp-content/uploads/2015/08/hand-351277_1280.jpg)
![[cml_meya_alt itz='654']calf-362170_1280[/cml_meya_alt]](http://mallata.com/wp-content/uploads/2015/08/calf-362170_1280.jpg)
![[cml_meya_alt itz='652']cow-391291_1280[/cml_meya_alt]](http://mallata.com/wp-content/uploads/2015/08/cow-391291_1280.jpg)
![[cml_meya_alt itz='653']cow-472842_1280[/cml_meya_alt]](http://mallata.com/wp-content/uploads/2015/08/cow-472842_1280.jpg)